13 Mar 2019 05:26

inkhel

Season hautak deuh kan hmang tan dawn: Lewis Hamilton

Lewis Hamilton chuan Formula 1 season thar bul tannaa Australian Grand Prix chu hautak viau tura a rin thu a sawi.

Tun kar tawpah hian Australian Grand Prix hmangin Formula One season thar an tan dawn a, vawi nga ngawt world champion lo ni tawh Lewis Hamilton chuan Australia ramah hian inelna hautak zet mai an hmachhawn nghal a rin thu a sawi a ni.

Season liam taah khan Ferrari chu Australian Grand Prix-ah an chak a, tun hnaia season thar atana inbuatsaihnaa test an neihah pawh Ferrari chu an chungnung hret bawk a. Hetiang a nih avang hian Mercedes driver Hamilton chuan chak tur chuan theihtawp chhuah tak meuh a ngaia a rin thu a sawi chhuak.

Ferrari chuan season hmasa khan bul an tan tha hle a, season tluanchhuak deuh thawah khan an car chu Mercedes aiin a chungnung deuh char char a. Mahse, Ferrari driver Sebastian Vettel chuan tihsual a neih hnem tak em avangin season tawpah Lewis Hamilton chu a champion ta thung a, vawi hnih intlansiak tur la awmin Hamilton hian title a la thei der a ni.

Mercedes team principal Toto Wolff chuan, “Barcelona a kan chet vel dan thlir hnu khan inelna hautak zet mai a awm chho dawn tih a hriat theih mai a. Mahse, F1 season hi chu a tira tlan chak ber atanga teh chi a ni lo tih hriat a tha,” a ti.

Hamilton chuan, “Tun season chu a hma zawng aiin a khirh dawnin a lang a, inelna hmachhawn tur hautak ber tum a la nih ka ring a. Keini team hian tawn hriat kan ngah a, kan champion thei pawh hi vanneih vang hrim hrim a ni lo tih a chiang hle a. Theihtawp kan chhuah a, fimkhur taka hun kan hman a pawimawh dawn hle a ni,” a ti.

Nikum lamah khan Lewis Hamilton hi driver zingah chuan a chungnung hle a, intlansiak vawi 19 ah vawi 11 zet mai a chak hei a. Tun season-ah Mercedes chuan Hamilton bakah Valtteri Bottas te bawk chu an chhawr leh dawn a ni.

Ferrari lamah Kimi Raikkonen hmun ruak luah turin Sauber atanga an lak Charles Leclerc a awm a, Sebastian Vettel chu an thiampuipa ber tur a ni a. Kum 31-a upa Vettel chuan, “Kumin chu season nuam tak kan hman theih ka beisei a, nuam ti tur chuan chak a ngai a, chak chhoh chuan title la thei khawpa chet a tul a ni,” a ti.