11 Jun 2019 01:02

bakteaJr.

Mizo tlangval

​Schwarz ka hneh loh chuan ka retire ang – Tyson Fury

British boxer Tyson Fury chuan tunkar tawpa a hnek tur Tom Schwarz chu a hneh lo a nih chuan boxing khelh a chawlhsan tur thu a sawi.

Gypsy King hian a British pui Anthony Joshua chungchang pawh sawiin, AJ chuan Andy Ruiz chu a hneh lo leh a nih chuan AJ hian boxing khelh a chawlhsan mai a ngai tawh dawn niin Fury hian a sawi bawk.

Fury hian a boxing career-ah hneh loh a la tawng ngai lova, world heavyweight champion hlui hian hneh loh la nei lo ve bawk leh WBO intercontinental heavyweight title kawl mektu Schwarz chu a hneh ngei a ngai dawn a, a hneh lo a nih chuan a sawi ang hian a retire tak tak a rinawm.

Fury chuan, “AJ hi a sawi anga a rawn kir thei lova, Andy Ruiz hi a hneh lo nawn leh ngat a nih chuan Tyson Fury emaw Deontay Wilder-a te lakah hian eng a ti thei tawh dawn lova, keini pahnih chauh ni lovin, heavyweight tha pangngai ve deuh lakah fight a hmu tawh lovang.

“Rematch-ah AJ hian Ruiz a hneh loh chuan a tan engkim a tawp dawn a, ‘mangtha’ a ni tawh mai dawn. A retire mai a ngai dawn , chu bak kawng a awm lo.Career tha tak a nei a, sum pawh a lalut nual tawh; chu bakah heavyweight title a lo kawl tawh a, chumi in a ken tel zawng zawng pawn a chen hman a ni.

“Keipawhin Tom Schwarz hi ka hneh lo a nih chuan ka retire ve ang. Andy Ruiz hi hneh lo ta ila ka retire ngei anga, Schwarz pawh ka hneh loh chuan ka retire dawn. Rematch ka nei phawt anga, ka chak thei chuang lo a nih chuan ka retire chiang ngawt ang.

“Keimah leh keimah inbumin chhuanlam ka siam lo anga, pa takin Schwarz ka fak anga ka retire hmiah ang. Mahse chu chu a thleng dawn lo, a chhan chu ka chak ngei dawn a ni,” a ti.