Schumacher a ziaawm hret hret zel: Jean Todt

31st July 2019, 03:07AM

Michael Schumacher chu kum nga leh a chanve zet an enkawl tawh hnuah tlem tlemin a changkang ve zel niin an sawi.

2013 kumah khan Michael Schumacher chu vur tawlhnaah a chesual a, a chetsualnaah hian a lu a sawh a, hei vang hian nikhaw hre loin a awm zui phah reng a. Dinhmun derthawng takah a awm chho reng a, tun hnaiah chuan hma a sawn ve hret hret niin an sawi a ni.

Ferrari team manager thin Jean Todt chuan tun hnaia Formula One driver ropui chanchin chu a sawi chhuak a. A nazawnga a dinhmun an sawi chhuah duh loh laiin hma a sawn thu hi Todt chuan mi hriatah a puangzar a ni.

Jean Todt hi Ferrari team manager a nih laiin Michael Schumacher chu an team driver chhuanvawr a ni thin a. Anni pahnih hi thawk dun an nih mai bakah inpawh em em mai an ni a, tun thlengin an la inpawh viau bawk a ni.

Todt chuan, “Michael Schumacher chuan hma a sawn chho ve hret hret zel a, tunah phei chuan TV atangin F1 intlansiak pawh kan en dun thin,” a ti.

“Hetiang kaihhnawih thila thu puanzar chungchangah hian ka fimkhur ve hle thin a, tuna ka thu sawi chhuah hi thil tak tak a ni a. Formula One intlansiak hnuhnung ber pawh kha Switzerland-a a chenna inah TV atangin kan en dun ngei a ni,” a ti bawk.

December 2013 khan French Alps ah Michael Schumacher hi vurah a tawlh a, a chesual a, a lu chu lungah a tauh a, nikhua a hre zui ta lo vang vang a. Damdawi inah hun rei tak an enkawl a, tlema a zia tak deuh hnuah an in lamah an enkawl chhunzawm leh a ni.

Schumacher-a nupui Corinna chuan a pasal dinhmun chu puanzar vak a remti lo a, hei vang hian a chanchin ngaihventute chuan eng dinhmunah nge a din tih chu an hre lo viau zel a. A chetsual hnuah hian mi hmuh theihin a awm zui ta lo hrim hrim a ni.

“Michael chu mi thiam ber berte enkawlna hnuaiah a awm mek a, a chenna inah uluk takin an enkawl mek a. Tlawm mai a tum lo hle a, dam that leh ngei hi a tum tlat a ni,” tiin Jean Todt chuan a sawi.

International Automobile Federation (FIA) president ni mek Jean Todt chuan Michael Schumacher hi a ngaihtuah hle a, a dinhmun ngaichang hian a tlawh ngun hle a ni.

Copyright © inkhel.com 2024. All rights reserved.