27 Oct 2020 04:23

inkhel

Schumacher a thawkrim, Hamilton a thiam: Massa

Felipe Massa chuan Pathiannia world record thar siamtu Lewis Hamilton leh a hmaa record siamtu Michael Schumacher te chungchang a sawi a, Schumacher chu a thawkrim zawk a, Hamilton chu a thiam zawk niin a sawi.

Pathiannia Formula 1 Portuguese Grand Prix an tlanah Mercedes driver Lewis Hamilton chu pakhatna niin, a vanglaiin vawi 92 a chak tawh a. German driver ropui Michael Schumacher-a record siam, vawi 91 chak chu a khum ta chiah a ni.

British driver Lewis Hamilton hian Michael Schumacher chu kawng khata tluk lohna a la nei a. Schumacher khan world title vawi 7 a la thei a, champion hnem ber a ni a, Hamilton chu vawi 6 a champion ve tawh a, record nihrual tur hian vawi khat champion a la mamawh a ni.

Formula 1 driver hlui, Brazilian driver Felipe Massa chu 2002 leh 2017 inkarah khan a intlansiak ve thin a. Season 15 chhung Formula 1 huanga a awm chhung hian Grand Prix-ah vawi 11 a chak a, podium-ah vawi 41 a lawn kai hman a, 2008 ah khan pahnihna a ni thei a ni.

Tun hnaia world record thar a siam avangin Hamilton chu mi tam takin Formula 1 driver ropui ber an ti chho a, thenkhatin Michael Schumacher an la dah chungnun zawk avangin inhnialna a awm chho mek a ni.

Schumacher leh Hamilton te chungchang hi Massa pawh hian a sawi chhuak a, fitness chungchangah te, car buatsaih chungchangah te chuan Schumacher tluka dah san a neih loh thu sawiin, thiamna san lampangah chuan Hamilton chu a dah san zawk thu a sawi bawk.

Massa chuan, “Anni pahnihah hian a ropui zawk thlan thiam harsa ka ti hle a, Lewis nen hian team khatah kan la awm dun lo a, huai taka sawi pawh a harsat phah a. Car inang chiah hmangin intlansiak dun thin se ngaihdan siam pawh a awlsam deuh ang,” a ti.

“An pahnih hian driver tha leh ropui tak an ni ve ve a, kawng tam takah duhthusam an ni a tih theih ve ve bawk a. Technical deuha thlir chuan Michael hi ka dah sang zawk a, chutih rualin car khalh thiam kawngah chuan Lewis hi a chungnung zawkin ka hria,” a ti bawk.