Pathianni khan MotoGP season bul tanna atan Qatar-ah an intlansiak a, boruak eng eng emaw awm mahse Andrea Dovizioso chu pakhatna an nihtir zui tho a ni.

Ducati rider Andrea Dovizioso chuan Honda rider Marc Marquez chu a khum chiah a, Dovizioso hi pakhatna niin Marquez nen an inthlauhna hi second 0.023 chauh a ni a. LCR Honda rider Cal Crutchlow chu pathumna niin Suzuki Alex Rins chu palina a ni a. Veteran rider Valentino Rossi chu panganaah a thleng bawk a ni.

Intlansiak zawh hnu hian Ducati bike chu sawiselna a awm zui a, a ke hnung lama winglet an hman thar chu sawiseltu an awm a. MotoGP thuneitute chuan hemi chungchang hi an en fiah nghal vat a, mahse engmah thil fel lo an hmuh loh thu sawiin, Dovizioso chu pakhatna a ni tih an puang chiang leh a ni.

Ducati bike sawiselna hi a tir takah phei chuan FIM thuneitute chuan an lo hnawl nghal a, mahse ngun zawka an ngaihtuah hnuah MotoGP Court of Appeals ngaihtuah zui atan an ti leh ta zawk a. Chiang lehzualin hemi chungchang hi an chhui leh ang a, thutlukna pawh hemi hma hi chuan siam mumal theih a nih dawn loh thu an sawi.

Hetianga thawm neuh neuh a awm zui hnu hian pahnihna ni ta, MotoGP champion ni lai Marc Marquez chuan, “Intlansiaknaah theihtawp chhuah hi ka tum ber a ni thin a. Vawiinah pawh khan ka theih ang tawka thain ka tlan a, mahse kei aia tlan chak pakhat kha a awm tlat a, Dovizioso kha ka um pha ta ngang lo a ni,” a ti.

Bike an sawiselte hi Dovizioso khalh bakah paruknaa thleng Danilo Petrucci bike te leh Pramac rider Jack Miller bike khalh te an ni a. GP19 khawl hi Aprilia, KTM, Honda leh Suzuki team te chuan an hmang hlawm a ni.

Hemi chungchangah hian Dovizioso chuan a khawl thar chu khalh chhinna hun a neih hman loh thu sawiin, an intlansiak hma khan a en chhin ve chauh niin a sawi a. Intlansiak zawhah khan a bike chu a danglamna a hriat lem loh thu a sawi zui bawk a ni.

2019 Qatar MotoGP Results:

1. Andrea Dovizioso, Ducati
2. Marc Márquez, Honda
3. Cal Crutchlow, Honda
4. Alex Rins, Suzuki
5. Valentino Rossi, Yamaha
6. Danilo Petrucci, Ducati
7. Maverick Viñales, Yamaha
8. Joan Mir, Suzuki
9. Takaaki Nakagami, Honda
10. Aleix Espargaró, Aprilia
11. Franco Morbidelli, Yamaha
12. Pol Espargaró, KTM
13. Jorge Lorenzo, Honda
14. Andrea Iannone, Aprilia
15. Johann Zarco, KTM
16. Fabio Quartararo, Yamaha
17. Miguel Oliveira, KTM
18. Karel Abraham, Ducati
19. Tito Rabat, Ducati
20. Hafiz Syahrin, KTM
DNF
Bradley Smith, Aprilia, 2 laps remaining
Jack Miller, Ducati, 10 laps
Francesco Bagnaia, Ducati, 13 laps