Boxing khawvel mai bakah combat sports khawvelin a nghahhlelh em em Wilder vs Fury 2 chu a zo a, British boxer Tyson Fury chuan WBC world heavyweight champion Deontay Wilder chu hnehsawh taka hnehin ‘The Gypsy King’ hi WBC world heavyweight champion thar a ni ta.

A tir atangin Fury hi a ggressive zawk a ni a, Fury hian fight a thunun tluan. First round-ah Fury hian a that zia a lan tira, an inhnek hmaa a sawi ang ngeiin Wilder a pressure char char.

Second round a hmuhnawm zela, second round-ah hian Wilder a rawn che tha ve deuha, hei bak hi chet that a nei lo a tih theih. Third round an khela, Fury chuan Wilder a hnek tlu ta tla mai. Wilder hi a tho leh nghala, mahse heta tang hian ngai a awh thei tawh meuh lo a ni ber.

Fourth round atangin Wilder hi a ding nghet tawk tawh lo tih a langa, a zawiin, a chau tih a hriata, fifth round-ah Fury hian a hnek tlu leh bawka, Wilder-a beng chhung veilam chu thi nasa in, Fury-a’n a pek dar a hnek keh ni ngeiin a lang.

Wilder hi a zawi chhunzawm renga, Fury hian fight hi tih tawp vat tumin Wilder hi chawlhna hun a pe duh meuh lo. Wilder-a awm dan enin Fury hi a knock-out hlauh a nih loh chuan round 12 a khel thei dawn lo chiang tih a langa, kawng tinrengah a tumpui a hneh lo.

Round sarihna an tana, Fury bawk chungnung zelin, Wilder-a corner lam chuan towel var chu ring-ah an vawm lut ta tawpa, referee chuan fight ti tawp nghalin, hnehsawh takin Fury hian hnehna a changa, world champion a ni leh.

Wilder hi a corner-in towel var an theluh avangin a lungawi lo hle a, mahse a dinhmun enin a corner-te hian an tih tur tak an ti a, Wilder hian pawm harsa ti viau mahse thil dik zawk a ni tih chu a hriat thiam ngei a rinawm.

Wilder hi a vawi khat nan a tlawm ta a, Fury nen kum 2018-a an inhnehtawk tih loh kha chu hnehna la chang vek mahse an rematch-ah erawh a dingchang thei ta lo. Fury hi tunlai heavyweight boxer zinga tha bera ngaih a ni tawha, hneh loh a la nei lo.

Wilder a che ranga, a hnek a na bawka, mahse Fury hi a che rang zawka, a skills a that zawk bakah a technical zawk bawk. Fury hian a rihna a hmang tangkai thiam hle a, Wilder aia a rit tih a inhriat avangin an inpawm chilh apiangin Fury hian a rihna chu Wilder-ah a nghat thina, hei hian kawng tam takin kawngro a su ngei niin a lang.

He rematch tur contract an ziah lai hian fight pathumna awm tura tih tel a nih thu chanchinbu mite chuan an tarlanga, mahse boxing promoter Eddie Hearn chuan third fight chu tul a tih tawh loh thu sawiin, kuminah Anthony Joshua leh Fury-te chu inhnek tir ngei tura hma lak a nih tur thu a sawi zui ve nghal bawk a ni.