03 Jun 2020 08:08

bakteaJr.

Mizo tlangval

​Saul-a’n a club thar a puang

Tun kar tir khan Atletico Madrid midfielder Saul Niguez chuan social media lamah ni thum hnua a club thar a puan tur thu a sawia, chanchinbu mite chuan Saul hian club thar a zawm dawn niin an tarlan nasa nghal hle.

Ni thum a liam ta a, Saul chuan a sawi ang ngeiina club thar pawh puangin, a club thar hi Club Costa City a nih thu a puanga, mahse hei hi a club zawm tur ni lovin, a unaute nena an club din a ni a, Spain rama khaw pakhat Elche-a an project pakhat a ni.

English chanchinbu thenkhat chuan Saul hian Manchester United a zawm dawn angin an tarlang hmana, mahse Saul hian chhuah lam sawi lovin, an project a puangzar ta zawk a ni.

Saul hi Atletico atanga chhuak tur anga sawi a lo ni fo tawha, a chhuak lovang tih pawh sawi theih la awm chuang lo mahse, chanchinbu mite rin loh lam daih a puang.

Saul hian Atletico-ah release clause pound maktaduai 135 a nei meka, United chuan Saul hi lak dan ngaihtuahin, kar khata pound 200,000 hlawh tir an inhuam niin chanchinbu mite chuan an tarlang.

Kum 25 mi Saul hian tun season-ah Atletico tan game 37 khel tawhin, goal li a khung a tawha, Atletico player pawimawh ber zinga mi a ni.

Saul hi a naupan zual laiin Real Madrid academy-ah a awma, chumi hnuah Atletico academy lamah insawnin, Rayo Vallecano tan loan-in a khel zuai tih loh chu club dang tan a la khel lo.

Spain U16, U17, U18, U19, U20 leh U21 tante a khelh hnuah kum 2016 khan Spain senior team tan a khel tana, a ram tan hian vawi 19 inlan tawhin, goal thum a khung tawh.