Portugal forward Cristiano Ronaldo chuan season tharah hmun dang a pan dawn lo tih a sawi.
Kum 38 mi hian nikum Pawltlak thla khan Al Nassr a zawm a, Saudi Arabia-a a season hmasa berah nomawi hlawhchhuak lo mahse a theh lar nasa hle. Saudi club-te hian sum an nghah a, hei hi hmang tangkaiin player lar hip luh zel an duh.
Nipui bazar hunlai khan Europe-a tawnhriat nei tha Neymar, Karim Benzema, Sadio Mane, Riyad Mahrez, Jordan Henderson, N'Golo Kante leh midang engemaw zat an thlem lut a, thlasik bazarah pawh thawm an rawn nei lian leh viauin a rinawm.
Ilkay Gundogan, Raphael Varane, David De Gea, Mohamed Salah leh Luka Modric-te pawh an thlem mek tih thawm a awm a, an lalut anih chuan ngaihven an hlawh zual sawt ang. Cristiano pawhin hei hi a hmu chiang em em a, khawvela lang khawpin Saudi Pro League siam len a duh.
Real Madrid leh Manchester United forward hlui chuan, "Player naupang leh upa pawh nise, an lo lut anih chuan hma kan sawn phah ang. Intihsiakna hautak ve viau mahse player lar an la tam lova, hei vang hian ngaihsak ala hlawh tawk lo. Hma lam pan turin theihna a awm a, keichuan hei hi hman tangkai ngei ngei ka duh.
"Team tinte'n nomawi hlawhchhuah kan tum theuh a, player tha tak tak awm tho mahse duhkhawp ala tling lo. Club inrelbawlna leh inkaihhruaina chungchangah hmasawnna tur ala tam a, referee leh VAR bikah pawh in thuam that kan mamawh." tiin a sawi.
Cristiano hian nikum Sahmulphah thla khan Manchester United a kalsan a, inbiakremna an neih hnuin a contract neihlai an ti tawp. Al Nassr tan hian 2025 thleng daih contract ala nei a, chhuak tur angin a chanchin ziak fo mahse hmun dang pan a tum lo.
Sawi chhunzawmin Ballon d'Or vawi nga dawng tawh chuan, "He hmunah hian ka hlim awmzui zel ka duh. An duh leh tum anga an kal thei anih chuan sang takah an invawrh dawn a, khawvel league tha panga zinga tel turin theihna an nei." tiin a sawi.
Al-Nassr tan hian game 38 khelin goal 32 a khung tawh a, a thiante tih goal tur vawi 11 a siamsak bawk. Thitin thla khan Arab Club Champions Cup-ah an champion a, hei hi Saudi Arabia a pan hnua nomawi a chawi hmasak ber a ni.