Kimi Raikkonen chuan Ferrari a chhuahsan huna Sauber zawm a tum chhan sawiin, Saubar a zawm thei tur chu lawmawm a tih tak tak thu a sawi.

Formula 1 season an hman mek hi a zawh rualin Kimi Raikkonen chuan Ferrari a chhuahsan tawh dawn a, season tharah chuan Sauber driver a ni zui tawh dawn a. September thlaa Ferrari team in Raikkonen an chelh zui tawh loh tur thu an puan hnua a vawi khatna atan Raikkonen chuan a chhuah tur chungchang hi a sawi chhuak ve ta a ni.

Kum 39-a upa Finnish driver Raikkonen hi Austin khawpuia US Grand Prix-ah khan pakhatna a ni a, Formula 1 driver zingah chuan 1994 a Nigel Mansell hnua chak thei upa ber a ni a. September thlaa Monza intlansiak dawn khan Ferrari chuan tun season bak Kimi hi chhawr zui an tum loh thu an puang a ni.

Ferrari lamin chelh zui an tum loh thu an sawi hnu hian Raikkonen chuan Sauber team-ah contract a ziak tawh a. Sauber hi Kimi Raikkonen leh a chhungte awmna Switzerland lama inkulh an ni a, hei vang tak hian Kimi pawhin kum hnih chhung atan Sauber zawm hi a duh phah thu a sawi.

“Mi tam tak chuan Ferrari chhuahsan a Sauber ka zawm daih hi ka tan a lawmawm a ni tih an hrethiam kher lo ang a. Ferrari ah khan hun nuam leh tha tak ka hmang a, an hnena ka awm laiin title ka la a, intlansiak tam takah ka chak bawk a. Driver ka nih angin chona thar tam tak hmachhawn ka duh reng a, thil thar tawn hriat zel hi ka duh a ni,” tiin Kimi chuan a sawi a.

“Sauber hmunpui hi kan in atangin minute 40 kal vel chauh a ni a, keimah ber hi ka lawm a, ka chhungte pawh an lawm dawn chiang a. Ka chhungte bula awm tam theih hi kei chuan ka duh a, tunah chuan hei hi ka ti thei dawn tawh a, lawm lohna chi a ni lo hrim hrim,” a ti bawk.

Charles Leclerc chuan Ferrari lama Kimi Raikkonen hmun ruak a luah dawn a, 2007 a Italian team te title lakpuitu Raikkonen chuan hun rei tak a lo awm tawhna team a chhuahsan dawn hunah pawh rilru kawi leh lungawi lohna a neih loh tur thu a sawi a ni.