Formula 1 season thar an tan dawn hnai tawh a, team 10 tel tur zinga pakhat Sauber chuan 2019 season atan an hming an thlak a, Alfa Romeo Racing tih hming an pu tawh dawn a ni.

Swiss team Sauber te hian harh tharna an chang a tih theih a, 2016 leh 2017 ah te khan an che thei lo hle a, 2018 ah nasa takin hma an sawn a, Charles Leclerc chuan F1 khawvel a luhchilh tirh kumah Sauber chu dinhmun tha takah a dinpui thei a ni.

F1 driver la chawl lo zinga upa fal ber Kimi Raikkonen chuan Ferrari chhuahsanin Sauber hi a zawm thar a, kum 18 zet a lo chhuahsan tawh car chu kuminah a khalh ve leh dawn a, F1 season pangngai hmang tan tur Antonio Giovinazzi nen an inkawp dawn a ni.

Sauber hmunpui hi Hinwil, Switzerland ah a la awm chhunzawm zel dawn a, hnathawktute pawh an thlak danglam dawn lo a, an hming an thlak bak chu engkim a pangngai anga kalpui chhunzawm a nih tur thu an sawi a ni.

2006 leh 2009 inkar khan Hinwil ho hi BMW Sauber tih hming puin F1 ah hian an tel a, hemi hun chhung hian title an la ve nghe nghe a. 2008 Canadian Grand Prix ah Robert Kubica chu pakhatna a ni a, Polish driver zingah Formula One intlansiaka pakhatna ni hmasa ber a nih bakah Sauber chakpui thei hmasa ber a ni bawk a ni.

Alfa Romeo hian Formula 1 khawvelah chanchin an nei nual tawh a, 1950 a F1 championship an neih tirhah leh 1952 khan an champion a. Anni hi Ferrari ho telna Fiat group ah an tel bawk a ni.