Indian basketball player lar Satnam Singh chuan Commonwealth Games-ah beisei pha lo viau mahse Asian Games khel thei tura tha thara beih a tum thu a sawi.

Australia rama Commonwealth Games khelh zawh takah India chuan beisei a pha lo hle a, Pool B ah Scotland, England leh Cameroon te nen an awmho a, an khingpuite an hneh lo vek a. Jakarta Asian Games lo awm turah India chuan qualifying an paltlang dawn a, hetah hian Satnam chuan tling ngei tura beih a duh a ni.

“Asian Games khelh phak hi tunah chuan ka tum ber a ni a, thil dangah rilru ka pe thei rih lo. Kan tum hmasak ber tur chu Jakarta pan thei tura tlin a ni a, inpuahchahna atan thla 5 chuang a la awm a ni,” tiin Satnam Singh chuan a sawi.

Satnam hian Commonwealth Games chungchang sawiin, “CWG a ka tel hmasak ber a ni a, a nuam ka ti khawp mai a. Ram dang atanga lo kal coach leh scout tam tak ka hmu a, American leh Australian player te nen pawh kan inkawm nual hman a. India chuan game 3-ah chak lo vek mah ila kan theihtawp kan chhuah a, tu te pawh khan tih tak zetin kan khel a, a lawmawm tho a ni,” a ti.

Kum 22-a upa Satnam hi Punjab ah a piang a, khawvela basketball league ropui ber, NBA khawvel dai tawh ngat a ni a, NBA draft-ah telin Indian basketball player zingah chuan hetiang thleng thei hmasa ber hi a ni.