Gianfranco Zola chuan Maurizio Sarri chu Stamford Bridge-a che tha tur chuan hun pek deuh a la ngai tih sawiin, Pep Guardiola pawh Manchester City a enkawl tirhin a hlawhtling nghal mai bik lo niin a sawi.

Maurizio Sarri chuan tun season-ah Chelsea a kaihruai tha thawkhat viau a, mahse tun hnaiah an che fuh lo chho ta nual a. Premier League game 4 ah an tlawm tawh a, Manchester City laka 0-6 ngawta an tlawm avang khan Sarri sawiselna thawm a rik rin phah hle.

Etihad Stadium-a an inkhelh zawhah Guardiola chuan Sarri chu a chhan zui nghal vat a, hemi hnuah Sarri assistant Gianfranco Zola pawh a tawng chhuak ve leh a. Zola chuan season hmasaa Premier League title latu Manchester City boss ang bawk khan Sarri pawhin hlawhtlinna hmel a hmuh theih tur thu a sawi a ni.

Zola chuan, “Kum hnih kaltaah khan Pep Guardiola kha miin an ngaisang hluai hran lo a, mi tam tak chuan sawi neuh neuh an nei hman a. Mahse, City thuneitute chuan Pep kha hun an pe a, dawhthei takin an nghak a, tunah chuan club hlauhawm leh hlawhtling tak an ni thei der tawh a ni,” a ti.

“Sarri pawh mi chuan an sawisel chho mek a, Chelsea game a ruahman dan pawh an sawisel nasa ta hle a. A nihna takah chuan miin sawisel viau mahse tlar hma lam leh tlar hnung lama an chet danah hmasawnna tam tak hmuh tur a awm chiang a, tlem tlemin hma kan sawn hret hret tih hi an hmu thiam lo mai mai niin ka hria,” a ti bawk.

A sawi zelnaah, “Pep Guardiola hi miin an ngaisang a, a thil tih chu tha turah an dah vek tawh a ni ber a. A ngaihsanawm chiang mai a, mahse hetiang dinhmuna a din theihna kawngah hian thawklehkhatah engkim a rawn fel nghal vek bik lo tih hriat a ngai a. Maurizio Sarri pawh hian hun harsa a tawn chho mek a, he hun hi a paltlang hunah chuan duh angin thil a kal chho ve thei tawh dawn a ni,” a ti.

Tun hnaiah Chelsea an chet fuh loh avangin Sarri hmalak dan sawiselna thawm a ri ring viau mai a, club a enkawl dan te, team ho training a neihpui dante thlengin mi tam tak chuan an sawisel chho tawh a. Mahse, Zola chuan Napoli coach hlui hian a kalphung chu a thlak danglam phah a rin loh thu a sawi a ni.