Chelsea leh Italy midfielder Jorginho chuan Italian manager Maurizio Sarri hnuaia a khelh lai khan, miin Sarri-a fapa tia an koh kha a duh loh hle thin thu a sawi chhuak.

UEFA Men’s Player of the Year atana thlan thar Jorginho hi Chelsea-a lalut tu chu Sarri hi a ni a, Manchester City-in an lak tep hnuah Sarri-a sawmna pawmin kum 29 mi hian kum 2018 khan Napoli atangin Chelsea a pan ta zawk.

Jorginho hi Chelsea a zawm tirhin a che tha mai lova, mahse Sarri chuan a chawlh tir ngai meuh loh avangin Jorginho hi ‘Sarri-a fapa’ tia koh thin a ni a, Jorginho hian chu chu a huat thin thu a sawi.

“Chelsea-ah khan bul ka tan that loh avangin Napoli kha ka ngaih zual phah em em thin a, mi khan ka che muang an ti a, ka chak tawk lo an ti a, Sarri-a fapa ka nih thu te an sawi thin a, ka thin a rim em em thin a ni.

“Mahse an rin ang ngawt ka ni ta si lova, club ka zawm thar apiangah ka che tha nghal ngai lova, Verona ka luh tirh pawhin tumahin min duh lova, fourth division lamah loan-in min khelh chhuah tir a, chutah pawhin tumahin min duh chuang lo.

“Beidawng lovin ka bei zel a, mi zah ka hlawh chho a, Verona-ah ka kir a, Serie A khel turin kan inpet tling zui ta bawk. Napoli-ah pawh hun khirh tak ka paltlang phawt a, Sarri a rawn lut a, engkim a danglam zui.

"Chelsea-ah pawh min sawisel a, mahse kei chuan min sawiselna te hi ngaiah ka nei a, heng min sawisel tute hi an la zak dawn tih ka hre ru kar thin. Tunah chuan Europa League title leh Champions League title nen ka awm a, chuvang chuan min sawiseltu te zawng zawng chungah lawmthu ka sawi duh a ni,” a ti.