12 Jan 2019 09:22

inkhel

​Sarri-a’n Premier League-ah VAR awm lo turin a duh

Video Assistant Referees (VAR) chu Europe league lian thenkhatah hman a ni mek tawh a, UEFA Champions League lamah pawh tun season round of 16 atangin hman tan a ni dawn.

Premier Legaue-ah erawh hman a la ni ve lova, season thar atanga hman tan turin ruahhmanna a kal mek. Premier League-ah VAR hi hman la ni lo mahse League Cup lam; Carabao Cup-ah erawh hman a ni a, VAR vang Chelsea chu Tottenham lakah an tlawm zo chiah nghe nghe a nih kha.

(adsbygoogle = window.adsbygoogle || []).push({});

Chelsea manager Maurizio Sarri chuan VAR hi English referee-ten an la hman thiam tawk loh thu Spurs an hneh loh hnuah a lo sawi tawha, Premier League-a Newcastle an hmachhawn hma match conference-ah pawh VAR chu Premier League-a hman atan a duh loh thu a sawi leh.

Chelsea hian Premier League inkhelah Newcastle an hmachhawn dawna, he game-a referee tur hi Chelsea-in Spurs an hneh loh tum a VAR viltu ber Chris Kavanagh a ni dawn. Sarri chuan VAR chungchangah zawhna chhangin, “Referee lamah buaina ka nei lo. Buaina ber zawka ka ngaih chu referee-te hi VAR hmang turin an la inpeih tawk lo tih hi a ni. Linesman kha a tlan lai a tawpa, chu chu player-te tan chuan offside tihna a ni.

“Mahse hetiang hi chu thil thleng ve tur reng a ni a, a vawikhat nan VAR an hmanga, an la bel tawk lo. Keichuan VAR hi ka duh lem lova, stadium chhung boruak a ti khailakin, goal thun hnuah second 30 chhung vel kan goal thun lawm nan nghah a ngai thin. Stadium chhung boruak a ti chhe hle in keichuan ka hria. VAR hman erawh ka tan thil thar a ni lova, a chhan chu Italy lamah kum thum kalta atang khan kan hmang reng tawh a, keichuan ka duh ve lo, sawi tur dang ka hrelo,” a ti.

(adsbygoogle = window.adsbygoogle || []).push({});