Cesc Fabregas chuan Stamford Bridge a chhuahsan chhan ber chu Maurizio Sarri-a’n ‘a fapa’ Jorginho a lak luh vang niin a sawi.

Spanish midfielder Cesc Fabregas chuan kumin January thla khan Chelsea chhuahsanin AS Monaco a zawm a, a chhuah chhan hi Jorginho an lak vang a nih thu a sawi a. Sarri-a’n £57.4 million a Jorginho a lak khan Fabregas chuan Stamford Bridge-ah a hun a tawp tih a hriat thu a sawi bawk.

Fabregas chuan, “Thil tum thar neih duh zel mi ka ni a, engtik lai pawhin hmabak hlen tur hi ka intuk fo thin a. Chelsea-a ka awm lai khan ka duh chuan ka contract pawt seia hun rei zawk la awm thei ka ni a, mahse coach thar a rawn lut a, a fapa ang tluka ngaih theih player a awm bawk a, cham zui zel kha ka duh tawh loh phah,” a ti.

“Ka tan chuan game zawng zawng khelh theih kha a harsa a, chutianga tih theih chu ka duh ber a ni thung a. Football hi ka ngaina a, Chelsea tana khelh vang khan ka hlim phah kher lo a, ka inkhelh hnem theih hian ka hlim thin zawk a ni,” a ti bawk.

A sawi zelnaah, “Eng ang pawhin khel thain, training na velah pawh che tha thin mah ila, awmzia a awm vak lo a. Game tina khelh chu a ngaihna a awm tawh lo a, hei vang hian hmun dang pan mai kha ka rilruk phah ta a ni,” a ti.

Fabregas hian 2014 khan Barcelona atangin Chelsea a zawm a, Stamford Bridge-ah kum nga chhung hun a hmang hman a. Blues tana a khelh lai hian Premier League title pahnih bakah FA Cup title leh League Cup title te a la hman a ni.

French club Monaco a zawm hnuah Ligue 1 game 7 khelhah goal 1 chu a thun ve tawh a ni.