11 Feb 2019 09:57

inkhel

​Sarri-a thukhawchang

Chelsea chuan Sunday zan inkhelah Premier League-a an chak loh nasat ber tum tawngin, Manchester city lakah 6-0 laiin an tlawm.

Chelsea manager Maurizio Sarri chuan hetiang taka an tlawm chhan chu a ngaihna a hriat bik lo thu inkhel zawh press conference-ah a sawi. Sarri chuan, “City lakah khan ka football ka hmu lo. Kan khelh theih loh chhan hi kan hriatchhuah a ngaia, chu chu thil awlsam a ni dawn lo. Thil a inthlak danglam meka, a hma khan home aiin away-ah kan tha zawka, tunah erawh a letling chiah a ni.

“Tunah chuan a chhan leh vang ka hre rih lova, mahse a chhan leh vang zawng chhuak turin ka bei dawn a, a chhan chu ka football khelh hi a ni ka tum ber. Football dang khelh ka tum lova , tunah erawh football dang daih kan khel a ni,” a ti.

Inkhel zawhah Sky Sports in an kawmnaah Sarri chuan ban a nih tur leh tur loh chungchang a hriat loh thu leh club an zawh mai a ngaih tur thu a sawi. Sarri chuan, “Chik taka en thlithlai mek ka ni tih chu ka hria , team enkawltu ber ka ni miau a, thil nihdan tur a ni.

“Ka hmalam hun ka hre lova, club in zawh a ngai ang. Ka team ka ngaihtuah bera, kan khelhdan hian ka rilru a luah. Ka hna chu thil derthawng a ni sa renga, chulamin ka rilru a kap lova, club in zawh a ngai ang,” a ti bawk.

Inkhel zawhah City manager Pep Guardiola chuan Sarri hi chibai a tum a, mahse Sarri hi a kaltlanga, City boss hi a chibai lo. Sarri chuan hemi chungchang hi sawi fiahin, “Khatih hunlai khan ka hmu lo. Nidang chu nise ka va be leh em em ang, mahse khatih hunlai khan dressing room-a luh thuai ka duh avangin ka hmu lo palh a ni a, Pep nen hian buaina engmah kan nei lo,” a ti.