Diego Costa chuan Atletico Madrid a chhuahsan hnuah club a la nei leh lova, tunah hian Brazilian club Sao Paulo chuan lakluh tumin hma an la mek tih chanchinbu mite chuan an tarlang.

Costa hi Sao Paulo hmela, Palmeiras pawhin an ngaihven meka, Brazilian club pahnih te hian Chelsea striker hlui hi an inchuh dawnin a lang chho mek.

Costa hi Brazilian club bakah Saudi Arabian club Al Nassr pawhin lakluh tumin hma an lo la tawh bawka, Al Nassr hian kum 2022 thleng contract ziahpuia, hemi hun chhunga pound maktaduai 5.2 vel hlawh tir an inhuam nia sawi ni mahse Costa hian a hnar.

Palmeiras hian Costa hi chhiah chawi hnua pound maktaduai 2.6 hlawh turin an tlem ve bawka, mahse Palmeiras manager Abel Ferreira chuan Costa hi inbiakna an neihpui lo niin a sawi.

Costa hian January thla khan Atletico Madrid a chhuahsana, free agent ni mekin, Turkey leh Qatar lam atang pawhin dawrtu a nei a, Premier League club thenkhat pawhin an dawr nia sawi a ni.

Kum 32 mi hian Brazil-ah a career hman zawh a duh thu a lo sawi tawha, Sao Paulo hi a pan a rinawm chho hle a, kum hnih daih contract ziah a duh nia sawi a ni bawk a ni.