Santosh Trophy : Valpuia goal hmangin Mizoramin Kerala hneh

05th March 2015, 11:03PM

69th National Football Champions for the Santosh Trophy Final Round match hnihnaah Mizoram chuan an khingpui Kerala chu si khat faiin Valpuia goal hmangin an hneh a, Mizoram Final Round Group B-ah game hnih khel tawhin point 6 an nei a, group leader an ni mek a ni.

Nikum khan Final Round match hmasa berah Mizoram hian Kerala hi 3-1 in an lo hneh tawh a. Khami tum pawh khan team tha tak an nih thu Mizoram team enkawltu ten an sawi a nih kha. Kumin pawh hian an tha leh khawp mai a, inkhelh harsa tak karah 65th mins-a F Lalrinpuia goal ropui hmangin Mizoram hian hnehna an chang ta a ni.

Mizoram 1-0 Kerala

Valpuia 65'

Mizoram XI : Awpa, Ruatthara, Ronald, Rinchhana, Rinzuala, MK-a, Samson (C), Tri-a, Biaktea, Valpuia, Sawmfela

Guru Gobind Singh Stadium, Jalandhar-ah Mizoramin bul tan tha mahse game a buai chhunzawm hlek, darkar chanve an khelh tlin hmain MK-a chuan chance tha zet zet vawi hnih a nei a, mahse goal-ah a chantir thei lo. Kerala lamin free kick atangin chance hlauhawm tak an rawn nei a, Mizoram keeper Awpa chuan a lo dang tha hle. Mizoram game a tha chho tawlh tawlh a, mahse half time-in a nang.

Second half tan a ni a, first half tawp hma hreta Mizoram coach-in Rinzuala lakchhuaka, Lawma a dah lut chuan second half tir lamah awmzia a nei tan nghal a, 51st mins-ah Ronald-a cross tha zet chu Valpuia chuan goal-ah a chantir teuh hle. Forward Sawmfela lakchhuah a ni a, Joseph-a dah luh a ni a, Hemi hnu deuh chiah hian Mizoram tan captain Samson Ramengmawia chuan goal a khung teuh hle a, a shot tha zet chu a over chiah chiah a ni.

65th mins a ni a, Mizoram chuan Valpuia hmangin goal an khung ta. Mizoram hian counter attack atangin an nawr a, Tri-a chuan ball tha takin Valpuia a pe a, Valpuia hian defender te tlanpelin, top corner-ah mawi takin a khung ta a ni. Biaktea lakchhuah a ni chhunawm a, Dingngheta dahluh a ni a.

Hun tawp dawn minute 5 la awmin MK-a leh Joseph-a te inthlawp a mawi hle a, Dingngheta chuan a chhawr tangkai teuh hle. A tawp thlengin goal dang a lut ta lo, Mizoram chuan si khat faiin Kerala an hneh ta a ni. Inkhel pumpui thlirin Mizoram team hian thuneihna an chang a, shots pawh an nei hnem hle a, an shots zawng zawng kha goal mouth-ah a thlawk a ni ber mai.

Kerala midfielder te an tha a, Mizoram pawhin harsatna an tawk deuh hlek thin. Mahse Mizoram coach-in team awmze neiin a siksawi a, Mizoram hian khelh hnih an khelh atangin goal an chhuah lova, goal thum an khung ta a ni.

Mizoram manager Pu Vanlalngheta chuan,"Kan zingkawngah khuain min bumro deuhva, practice na hun tha pawh kan nei lo. Kan first match-ah kan tuar, kan match hnihnaah pawh harsatna kan la nei chhunzawm. Kan game thumnaah erawh harsatna kan tawk tawh lovang.

"First half bul tan tha lo mah ila second half erawh kan khel tha khawp mai. Shots pawh kan ngah a, Kerala hi team tha tak an ni a, hmachhawn harsa tak ni mahse kan hneh angreng a, goal erawh kan khung tam thei lo mai chauh a ni. Kan naute khelh danah beisei phak lo mahse kan lungawi hle," tiin inkhel.com a hrilh. Mizoram hian March ni 7, 2015 (Inrinni) hian nikuma final-a an hneh tawh Railways an hmachhawn dawn a ni.

Jalandhar leh Chandigarh-a Mizo ten an tawiawm leh a, Jalandhar Mizo Zirlaipawl ten match hmasa aiin an tawiawm tam lo deuh, exam an neih avangin a khaw nawtin an tawiawm thei lo erawh pawi an tih thu inkhel.com an hrilh. Jalandhar Mizo Zirlai Pawl te hian inkhel statistics an lo buatsaih a, Mizoram inkhelh dan kimchang kan hriat theih phah a, inkhel.com chu an chungah kan lawm tak zet a ni.

Copyright © inkhel.com 2024. All rights reserved.