Tunlaiah sawi hlawh em em Copa Libertadores final second leg-a Argentine club inhal pahnih River Plate leh Boca Juniors-te intum tur chu sawn hlat a nih hnuah an khelhna hmun tur pawh tih chian a ni ta.

Copa Libertadores final second leg hi River Plate home El Monumental-a khelh tura ruahhman ni mahse, khelh a nih dawn ni a Boca player-te chuanna bus chu beih chiam a nih avangin sawn hlat a ni a, boruakin that lam a pan theih bawk lo nen, a khelh hun tur chu sawn hlat duai a nih bakah a hmun tur pawh mel 6000 vela sawn hlat duai a ni.

First leg chu Boca mual La Bombonera-ah khelh a lo ni tawh a, team hnihte hi 2-2 in an inhnehtawk. Second leg erawh khelh hleihtheih a ni lova, Argentina-ah pawh khelh ni dawn lovin, Spain khawpui Madrid-ah Real Madrid stadium Satiago Bernabeu-ah khelh a ni dawn.

Buernos Aires mayor Horacio Rodriguez Larreta chuan bus beitute hi River Plate supporter ruh zual, ‘mafia of Argentine soccer’ an tih mai te thil tih a nih thu a sawi tawh a, police-te chuan he pawl hotupa ber in luhkhung nghalin, pesos maktaduai 10 bakah final ticket 300 lai an man sak.

River Plate chu he thil thleng avang hian pound 312,734 chawi tir an ni bawk. Boca lam hian beihna an tawh hnu hian Capa Libertadores trophy chu second leg khel lova hlan mai nih an phutna chu South America-a football thuneihtu sang ber Conmebol chuan a hnawhsak. Spain prime minister Pedro Sanchez chuan khuah taka venhimna kalpui a nih tur thu leh, venhimna chu an kalpui tan mek tawh thu a sawi  nghal bawk a ni.