Manchester City chuan an winger Leroy Sane chu contract thar an zawrh meka, inremna la nei lo mahse inbiakna a kaltluang niin City manager Pep Guardiola chuan a sawi.

Sane hian kum 2016 khan German club Schalke atangin Manchester City hi a zawm a, a manah hian City chuan pound maktaduai 37 an seng. Pep chuan Sane contract thar an zawrh chungchang sawiin, “Thu ka dawn hnuhnun berah kha chuan inbiakna a kaltluang tih ka dawng.

“Club hnen atangin Sane-a contract thar chungchangah buaina a awm thu ka dawng lo hrim hrim a, hun a duh ve hrim hrim a ni. Raheem Sterling-a chungchangah pawh hun a duh tih kan lo hmu tawh a, ni khat thil thu a tihfel ngawt theih a ni lo. Mahse, Kevin De Bruyne erawh kha chu ni khat emaw ni hnih chhungin a fel vek thung.

“Sane hi hun rei tak City-ah hian a cham ka beisei. Raheem-a chungchang ka sawi ang tho khan Sane pawh hi tun ai hian a la khel tha theiin ka hria a, kawng tam takah hma a la sawn zel thei. Pa a lo ni ve ta a, pa kan nih hian kawng engkimah puitlin kan zir pawhin ka hria. Season liamta khan Sane hian season tha tak a hmanga, left wing-ah tlanin a khel tha a, game pawh a khel hnem hle. Mahse, player-te hi fak zen zen hi tunah chuan kan duh rih lova, December thla chiah a la ni a, season thui tak hman tur kan la nei a ni,” a ti.

Pep-a sawi ang hian Sane hi season liamta khan City-in Premier League title an lakna kawngah a thawhhlawk hle a, PFA Young Player of the Year lawmman pawh hlan hial a ni.