Pep Guardiola chuan Leroy Sane chu an hnena a la awm zui zel a beisei thu sawiin, Bayern Munich nen an la indawr loh thu a sawi.
Bundesliga champion Bayern Munich chuan Leroy Sane hi lak an duh niin thu a thang mek a, season hman zawh tak tawp rual khan an winger chhuanvawr pahnih Franck Ribery leh Arjen Robben te chu an chhuak a, an hmuh ruak luah tur hi an zawng nasa hle a, chutiang tur chuan Manchester City winger Sane hi an duh deuh ber a ni.
Bayern Munich chairman Karl-Heinz Rummenigge leh coach Niko Kovac te chuan kum 23-a upa Leroy Sane an duh thu an sawi chhuak ve ve tawh a, German winger hian Etihad Stadium a chhuahsan duh a nih phawt chuan Bayern chuan lak vat an duh tih thlengin an sawi tawh a ni.
Manchester City manager Pep Guardiola chuan a club enkawl thin Bayern Munich in an player an duh thu an puang vak mai chu tha a tih loh thu sawiin, Leroy Sane chu Premier League lama la chelh zui zel a duh thu a sawi tel bawk.
Guardiola chuan, “Hun rei tawh tak atang khan Bayern Munich hian Leroy Sane an duh thu hi an sawi chhuak tawh a. Thawm nei chho viau mahse Leroy hi kan player a la ni a, season thar mai bakah season dang lo awm zel turah pawh kan zinga a awm zui zel ka beisei tlat a ni,” a ti.
“Leroy chungchangah hian Bayern Munich nen kan la inbe miah lo a, club dang pawhin min la dawr lo hrim hrim a ni,” a ti bawk.
Transfer window inhawng mekah City chuan thawm an nei lo angreng hle a, Atletico Madrid atangin defensive midfielder Rodri an la a, hei bak hi chu chanchin lian tham an nei lem lo hle.
“Tuna kan squad neih mekah hian kan lung a awi tawk hle a. Kan player neih sa hian hmun dang an pan dawn leh dawn loh kan hre lo a, player thar kan neih belh dawn leh dawn loh pawh a sawi theih rih loh a. Kan neih saah hian kei chu ka lung a awi viau a ni,” tiin Guardiola chuan a sawi.
City hi Leicester City atanga Harry Maguire lak duh angin an sawi mek a, Maguire hi Manchester United pawhin an beisei viau bawk a. Guardiola chuan central defence thawm that chu a rilrua lian deuh ber a nih thu sawiin, England defender Maguire la kher lo pawhin an player neih sa hman tur an la awm thu a sawi a ni.