18 May 2020 11:26

bakteaJr.

Mizo tlangval

​Sancho hian Ballon d’Or a dawng thei: Hargreaves

England midfielder hlui Owen Hargreaves chuan English rawlthar Jadon Sancho chu Ballon d’Or dawng thei tur khawpa tha a nih chhoh a beisei thu a sawi.

Kum 20 mi Borussia Dortmund player Sancho hi tunlai rawlthar zinga beiseiawm ber zinga mi a ni a, la naupang hle mahse Dortmund player pawimawh niin, kum 2017-a Dortmund a zawm hnuah vawi 91 khel tawhin, goal 31 a khung tawh.

Sancho hi Manchester City academy chhuak a ni a, City thenawm Manchester United chuan kum 20 mi lakluh an tum hle a, Sancho hian Old Trafford a pan lovang tih pawh a sawi theih loh.

Manchester United midfielder hlui Hargreaves chuan Sancho-a chungchang leh United nena sawizawm a nih chungchang sawiin, “Jadon hian a inhre chiang ber dawna, a tana tha tur a thlan thiam a ngai dawn. United hian player naupang rawn tha chho tur tak tak an kawl nuala, tu tan pawh he team-a khelh chak loh chi a ni lo.

“Liverpool leh Manchester City te chu tun hnaiah Premier League-ah an tha fal hle a, mahse United pawh hi player-te’n an la zawm chak reng. Thil hi a inher kual renga, United tan pawh kawl a eng leh ngei dawna, Sancho ang player an lakluh theih phei chuan an insiam thatna kawngah a pui viau ang.

“Sancho hian Manchester a hre chiang sa a, City-ah a awm thin. Sancho lalut tu chu an vannei hle dawna, a man pawh a to dawn tih ka hria a, mahse ani hi chu kum 10 lo awm turah hian player danglam leh thlir bik a ni dawn.

“Ballon d’Or a dawng theih em tih zawhna a awma, a thei chiang a, player tha bik a ni a, tunah pawh a team tan nghawng a nei lian tawh hle. Mi tam zawk chuan player naupang te hian tha chhuak tur chuan hun an duh reiah an ngaia, mahse Wayne Rooney leh tunah Sancho ang te pawh, a ropui tur hi chu an tha chho nghal mai zel.

“Sancho hi khelmual chhunga a awm dan tur rin lawk thiam a har hle a, a tlangpuiin player-te khelh dan tur hi a hriat lawk deuh thina, mahse Sancho erawh Neymar te ang deuh thaw in a khelh dan tur hi rinlawk theih a ni lo.

“Anni ang player hi an tangkai em em a, team tawh khirh tak leh defence phui tak an hmachhawn changin Sancho te ang chuan hmun awl an siamchhuak thiam tlat a ni. Sancho hi chu Wayne Rooney ang deuhin, khawi league-ah pawh dah tawp ila a chet that ka ring.

“Champions League-a Dortmund-in PSG an hmachhawn tum khan, keiman kha game kha ka cover-a, khatah khan Sancho kha a khel tha bera, Kylian Mbappe leh Neymar te ai pawhin a khel tha zawk. A level hi a sang em em a, goal siam chhuah leh goal khung lamah hian a parvul chuk a ni ber,” a ti.