Oliver Kahn chuan Jadon Sancho chu a fak hle a, khawi team-ah pawh khel se, a khelhna team apiangin an thatpui a rin thu a sawi.

Borussia Dortmund winger Jadon Sancho ngaihventu an pung chho zel a, heng zingah hian Bayern Munich chu a langsar pawl an ni mek a. Germany captain hlui, Bundesliga champion Bayern Munich board member ni mek Oliver Kahn chuan England winger chu a fak hle a ni.

Kahn chuan, “Transfer window a la inhawng rih lo a, chu vangin player lak tur chungchang vel lo sawi vak a la rem chiah lo a. Chutih rualin, Borussia Dortmund player dangte ang bawkin Jadon Sancho hi player tha tak a ni,” a ti.

“Jadon Sancho hi eng team pawhin an thatpui ngei ang tih ka ring a, a thiamna hi a namai lo hle a, player tha tak a ni tih hi a lang chiang hle a. Borussia Dortmund chuan hetiang taka player tha an nei hi an vannei hle a ni,” a ti bawk.

Jadon Sancho chu Premier League lama kal tur anga sawi a ni nasa hle a, Manchester United, Liverpool leh Chelsea te chu pan thei dinhmunah a ding niin tam takin an sawi a. Hetih rual hian Manchester City player hlui hi Bayern Munich pawhin an ngaihven viau a ni.

Bayern Munich thuneitu zingah Oliver Kahn chauh hi Jadon Sancho faktu a ni bik lo a, head coach Hansi Flick pawhin a fak viau bawk a, player tha tak mai niin a sawi ve bawk a ni.

Hansi Flick chuan, “Club danga contract nei mek player chungchang hi ka sawi vak duh lo a, chuti chung chuan Jadon Sancho hi player tha zet mai a ni tih ka sawi chhuak duh a, Borussia Dortmund nen pawh hian an inhmeh ka ti hle,” a ti.

“Thiamna nei sang tak a ni a, player ropui chho tur a ni chiang bawk a. Dortmund hian player an nei tha tak zet a, an player neih zingah chuan a pawimawh berte zingah a tel ngei ka ring,” a ti bawk.

Sancho chuan tun season chhungin Bundesliga game 26 khelhah goal 14 a thun tawh bakah mi goal thun tur vawi 16 chu a siamsak tawh bawk a ni.