Sancho hi a man kan chhiar zatin kan hralh ang: Zorc

11th July 2020, 11:07PM

Borussia Dortmund sporting director Michael Zorc chuan Manchester United nen an sawi zawm mek Jadon Sancho chu an hralh chhuak dawn a nih pawhin a man an chhiar anga hralh a nih tur thu a sawi.

English winger kum 20-a upa Jadon Sancho hian 2017 nipui lai khan Manchester City chhuahsanin Germany a pan a, Bundesliga club hi a zawm a. Borussia Dortmund tan game 143 a khel tawh a, hengah hian goal 58 a thun tawh mai bakah mi goal thun tur vawi 54 chu a siamsak tawh bawk a. Tun dinhmunah chuan Europe khawmualpuia attacking player hlauhawm berte zingah an sawi tel tawh a ni.

2019-20 season hi Westfalenstadion a luhchilh hnua Sancho season hman that ber tum a la ni a tih theih a. A chet that em avangin nipui transfer window inhawn hunah pawh European club lian tam takin lei tuma hma an lak a rinawm hial a ni.

Michael Zorc chuan Jadon Sancho chu mi mit latu langsar tak a nih chhoh thu sawiin, transfer window inhawn hunah an chelh bet thei ta lo a nih pawhin a hmun ruak luah tur pawh ngaihtuah chhoh an rilruk thu a sawi chhuak.

Manchester United chuan Jadon Sancho hi lak luh an duh a, hun eng emaw chen chu an sawi zawm tawh nghe nghe a. Borussia Dortmund chuan Sancho manah hian €120 million (£107 million/$136 million) bawr vel an chhiar a, a aia tlawma chhuahtir an tum lo hle.

Zorc chuan, “Jadon hian kan hnenah contract pangngai a la nei a, season tharah pawh kan hnena a la awm zui zel theih chuan a lawmawm khawp ang,” a ti.

“Club dangin an duh viau a, lei talh an tum a nih chuan a man kan chhiarna ang chauh hian kan hralh dawn a, a aia tlawm chuan hralh kan tum lo,” a ti bawk.

Copyright © inkhel.com 2024. All rights reserved.