Jose Mourinho chuan Manchester United-a Jadon Sancho chetthatloh chhanah Erik ten Hag a puh.

Sancho hian loan hmanga Borussia Dortmund a zawm hnuah harh tharna a chang a, Champions League final luhpuiin Real Madrid an hneh lo. Beiseina sang tak nen Old Trafford pan mahse, a zuihral ti tih a, a man phuin vawi khat mah a khelchhuak lo.

A buaina ti zual tur hian Ten Hag nen an in hmu thiam lo leh zel a, nikum Mimkut thla khan an in chhang tawn nasa hle. Dutch manager hian a inthlahdah niin a sawi a, first team atanga a thehchhuah bakah an training-na bungrua khawih a phal lo.

Hemi chungchanga a ngaihdan an zawhna chhangin Mourinho chuan, "Thiamna a nei tha tih kan hria. Tihsual zeuh a nei tih a chiang a, mahse Ten Hag pawhin a theihna tak tak a haichhuak lo. United-in thil awm dan an ennawn ka ring a, an hnena a sulhnu leh Dortmund-a a sulhnu an buk tawn ang.

"Ka hun kal tawh ka thlir letin, player tam tak ka ti lungawi lo tawh a, an dinhmun ka hriatthiam loh fo bakah kawngdik ka zawh tir thei lo fo mai. A tam zawkah theihtawp ka chhuah laiin, buaipui duh loh pawh ka nei a, inrawlh tam tak an awm ve thin." tiin a sawi.

Sancho leh Ten Hag inkar hi a hnawk khawp mai a, inhnukhniam thei zawk emaw ngaihdam dil thei zawk emaw an awm lo. Sancho hian Old Trafford-a kir a hreh lova, mahse a kawng daltu lian tak a awm. £73m man lai a ni bawk nen United-in an ui a, thutlukna a siam hmain inbiakna neihpui phawt an duh.

Ten Hag nena an buai hnuah United jersey ala ha leh miah lova, Dortmund a pan hmain thla thum chuang a inkhel lo. United technical director Jason Wilcox leh director of football Matt Hargreaves-te chuan pre-season an tan hmain hmaichhana biak an duh a, a aiawhte pawh engkim an hrilh tawh.

Tha tak season hman an duh avangin, ram tana fehchhuak ve lote koh kir thuai an rilruk a, thla khat vel bak chawlh an pe lo. Sancho hian 2026 Nikir thla thleng daih contract a nei a, Dortmund-a awmzui zel a duh ber a ni.