Ole Gunnar Solskjaer chuan Alexis Sanchez chu che tha leh thei tur chuan goal khat khung a mamawh niin a sawi.

Manchester United boss Ole Gunnar Solskjaer chuan Arsenal atanga Old Trafford a luhchilh hnua che fuh hleithei lo Alexis Sanchez chuan hma a sawn leh vat thei a ni tih sawiin, chutianga ngai awh leh thei tur chuan goal a thun a pawimawh niin a sawi a. Goal a thun hnuah chuan mahni inrintawkna te neiin, a hma angin a che tha chho leh thei dawn niin a sawi a ni.

Alexis Sanchez chuan tun season chhungin Manchester United tan inelna hrang hrangah goal 2 chauh a la thun a. Hetiang taka a chet fuh theih loh avang hian Solskjaer-a hnuaiah khelhna hun a nei tlem hle a. Norwegian boss hian a aia che tha chho, kum lamah pawh la naupang zawk Anthony Martial leh Marcus Rashford te chu bul tantu atan a hmang nasa zawk a ni.

Solskjaer chuan, “Alexis hian goal khat han thun leh se, a che tha chho ve leh tial tialin ka ring a. Goal a thun hun hunah mahni inrintawkna a nei thar leh thei ang a, khelmualah amah tak tak kha a lang chho leh mai dawn a ni,” a ti.

“Chet fuh loh laklawh chuan mahni inrintawkna kan tlachham a, eng pawh hi kan ti fuh thei lo laklawh zel bawk a. Amah hi chu player tha tak mai a ni a, mahse a che fuh lo laklawh hian a pawt hniam rih mai mai a ni ber,” a ti bawk.

Chile forward Sanchez hian Arsenal a chhuahsan hma season-ah khan goal 30 ngawt a thun a, Emirates Stadium a chhuahsan hnuah beisei a pha thei meuh lo thung a ni.

Kum 30-a upa Sanchez chu Solskjaer hian tawn hriat ngah tawh tak a nih avangin player naupang zawkte anga ngun taka kaihhruai ngai a nih tawh loh thu a sawi.

“Sanchez thiamna hi ka hre chiang a, player tha tak mai, thiamna nei sang deuh mai a ni a. Eng eng emaw hi chu han sawi dun keuh keuh ngai chi a awm a, chuti tih lohah chuan player tawn hriat ngah tawh tak mai a ni a, kum tam tak a la inkhel chho thei turah ka ngai,” tiin Solskjaer chuan a sawi.

“Old Trafford-ah hian thla hnih vel chu ka awm ve ta a, ka luhchilh tirh khan a la inhliam a, hei vang hian tha theihtawpa khel nghal tur chuan beisei chi a la ni lo hrim hrim a ni,” a ti bawk.