King Power Stadium-ah Arsenal chuan mual neitu Leicester City chu 5-2 laia hnehin, tun season-ah a vawi khat nan Leicester City chu an tlawm ta a ni.
Mual neitu Leicester City lamin Vardy hmangin goal khung mahse Walcott chuan Arsenal si phurh a rul a, Sanchez chuan hattrick a siam chhunzawm bawk, hun tawp dawnah Vardy chuan Leicester City goal hnihna khung leh mahse Giroud chuan hun tawp dawn tak takah Arsenal goal 5-na a khung a, 5-2 in Arsenal chuan hnehan an chang ta a ni.
Leicester City 2-5 Arsenal
(Jamie Vardy 13', 89') (Walcott 18', Sanchez 33', 58', 81', Giroud 90+3')
PLAYER RATINGS (data source : eurosport)
Arsenal: Cech 6, Bellerin 5, Koscielny 6, Mertesacker 5, Monreal 5, Flamini 4, Cazorla 7, Ramsey 5, Ozil 6, Sanchez 10, Walcott 8.
Subs: Arteta 5, Oxlade-Chamberlain 4, Giroud 4.
Leicester City: Schmeichel 6, De Laet 7, Huth 6, Morgan 6, Schlupp 6, Mahrez 5, Kante 5, Drinkwater 6, Albrighton 6, Okazaki 5, Vardy 7.
Subs: Ulloa 5, Kramaric 4, King 5.
Leicester City -in bul an tan tha zawk a, na takin an nawr nghal buan buan, Vardy chuan chance a nei nghal nual a, Arsenal goal post pawh a pet per nghe nghe. Hemi hnu lawk hian goal a khung chhunzawm nghal a, 13th mins-ah Daniel Drinkwater ball vawrh tha zet chu Vardy chuan dawngin, box chhung thleng a tlanpui, angle tawt tak karah a pet goal ta tho a.
Leicester City hian hma an hruai rei lo, 18th mins-ah counter attack atangin Arsenal chuan goal an khung ve nghal zat a, Cazorla ball pek tha zet chu Theo Walcott chuan chak taka umin, bottom corner-ah mawi zetin a pet goal ve a. Darkar chanve an khel tling tihah chuan Sanchez chuan Arsenal tan goal a khung tan a.
Second half 57th mins-ah Sanchez chuan a goal hnihna thun lehin, Ozil ball pek tha zet chu Sanchez hian a tauh goal a, hun tawp dawn minute 10 la awmin, box pawn atangin mawi zetin Sanchez chuan a hattrick-na a khung ta. Hetih lai hian Leicester City chuan Vardy hmangin goal khat an rawn khung ve leh hlauh a, Vardy hian box veilam sir atangin mawi takin a thuai goal a. Hun tawp dawn tak tak 90 +3 mins-ah bench atanga rawn lut Giroud chuan Nacho Monreal cross tha zet chu goal-ah a chhuih lut a, 5-2 in Arsenal chuan hnehna an chang ta a ni.
Sanchez hian season hmasa khan goal 25 lai Gunners tan a khung a, chutih laiin tun season-ah erawh goal a la khung hlei thei lo, zaninah erawh hattrick a siam ta. He match-ah hian Leicester City an khel tha hle a, nawr pawh an nawr na a, Petr Cech chuan vawi engemaw zat Arsenal a chhanhim. Chutih laiin player nei tha zawk Arsenal chuan an chance an hlah lova, chance dang dang pawh an insiam nual bawk. Inkhel hmuhnawm tak a ni.
Leicester City chu table-ah 6-naah an tawlh thla ta a, Arsenal chuan khelh 7 atangin points 12 an hlawh chhuak a, table-ah 4 na an ni a, hmahruaitu Manchester United chu point 3 in an phak lo mek a ni.