22 May 2020 09:25

bakteaJr.

Mizo tlangval

​San Siro thiah phal a ni ta

Italy-a football stadium lar ber anga sawi ngam; AC Milan leh Inter Milan-te intawm San Siro chu thiaha stadium thar sak tum a ni a, hmalak mek zel a ni.

San Siro awmnaah hian stadium thar sak tum a nih angin, San Siro hi tih chhiata thiah a ngaia, hemi hi stadium thar sak leh sak loh daltu ber a ni tawh.

San Siro-ah hian mi 75,923 lai lengin, Europe-a stadium lian pawl a nih bakah Italy-a stadium lian ber a ni a, kum 1926-a hawn tan a ni.

San Siro hi Italy tana thil hlu leh langsar a nih tawh avangin duh duha thiah ngawt theih a ni lova, phalna lak phawt ngaiin, Italy heritage authority chuan an rama stadium lian ber thiah phalna thu a chhuah.

AC Milan neitu company Elliot leh Inter Milan neitu Chinese electronic retailer Suning-te chuan nikum khan San Siro awmnaah hian stadium thar sak dilna an thehlut tawha, an stadium tharah hi mi 60,000 lenna tura duan a ni.

He stadium thar sak nan hian San Siro pumpui deuh thaw chu thiah a ngai dawna, hemi chungchangah hian Italy heritage autority hnenah dilna thehlutin, phalna an hmu ta a, San Siro hi thiah tan thuai a nih a rinawm ta hle a ni.