Valentino Rossi chuan tunkar tawpa San Marino MotoGP intlansiakah podium a lawn theih ngei a tum thu a sawi.

Movistar Yamaha MotoGP rider Valentino Rossi hi nikum khan a inhliam avangin helai hmunah hian a tlan thei lo a. Misano World Circuit Marco Simoncelli-ah hian Italian rider hi a che chhe lo thin hle a, vawi thum chu chak ber a lo ni tawh a, a hnuhnung ber chu 2014 khan niin, vawi 6 chu podium-ah a lawn tawh a ni.

Kum 39-a upa Rossi chuan, “Mahni muala kir hi chu a danglam bik hle thin a. Kar eng emaw zat kalta khan Misano-ah kan tlan chhin a, tunah hian kan hmabak kan chhunzawm leh dawn a ni,” a ti a.

“Theihtawp kan chhuah ang a, tlan chhin atanga intlansiak tak tak thlengin a tha thei ang bera tlan kan tum dawn a. Result tha thei ang ber neih kan tum ang a, podium-ah lawn ngei kan tum dawn a ni,” a ti bawk.

Rossi chuan, “Khua tha se ka ti hle mai a, chuti a nih theih chuan tu te pawh tha takin kan tlan thei theuh dawn a ni,” tiin a sawi.

MotoGP rider standing-ah Valentino Rossi hian point 142 hmu tawhin pahnihna a ni mek a, Repsol Honda Team rider Marc Marquez chu pakhatna niin point 201 a hmu mek a. Ducati rider Jorge Lorenzo chuan point 130 a hmu a, pathumna dinhmun a luah mek bawk a ni.