September ni 28, 2019 khan WMMAC (World Mixed Martial Arts Council) buatsaihin ram hrang hrang atanga kal khawm mi 18 te hnenah international sports award sem a ni a. He award hi promoter leh instructor-te hnena hlan niin, India ram atangin Samuel Lalrozama pawhin a dawng.
Samuel Lalrozama hi Dr. Thangchungnunga, Dawrpui fapa niin, India ramah MMA pioneer (bul tantu) te zinga mi a ni a, North East-a bul tantu a ni bawk a. National body-ah Technical Chairman a ni tawh a, India mite zinga certified international referee hmasa ber niin world championship leh UFC Fight Week-a referee hna thawk hmasa ber a nih bakah India ram ti hmingthain khawvel hmun hrang hrangah seminar leh referee hna thawkin national leh international federation-in a tir kual thin a ni.
Award semnaah hian Thailand sipai lal Lt. Colonel Pathong chu chief guest niin he hun hi a hmanpui a. Samuela chuan National mai bakah Mizoramah pawh MISMA (Mizoram State Mixed Martial Arts Association) kal tlanga MMA tana khawvel pum huapa Mizote lang thei turin hma lak zel an tum thu a sawi a. Samuela hi Lelte Young Achiever's Award lo dawng tawhtu a ni.
Tunah hian Samuela chuan MISMA lamah thawhpui tha tak tak, President Lalthakima leh Honorary President Jeremy L. Pautu–te zarah kum tluan event an neih ziah thu a sawi a, sponsor leh mipuite thlawpna zarah event lian zawk neih chhoh an beisei thu a sawi bawk. Samuela hi traditional martial art lamah chuan Muaythai background nei a ni.
MMA hi khawvela infiamna thang chak berte zinga mi a ni a, India ramah pawh fight night tam tak a awm chho mek a. Traditional art eng emaw background pakhat kalpui neiha MMA sport luh hi a hlut zual bik thu sawi a ni thin a, chutiang zingah chuan Muaythai leh BJJ te chu a tha pawl nia sawi a ni bawk.
MISMA hi India rama MMA body lian ber ‘MMA India’ hnuaia awm a ni a; hei hi hi khawvela MMA body lian ber IMMAF & WMMAA hnuaia awm a ni ve leh a, UFC-in a sponsor-na hnuaia kal a ni. Tunah hian Olympic movement kalpui mek a ni a, ram 40-ah an ram sawrkar/Olympic-in MMA hi a pawm tawh a, WADA approval dil mek a ni bawk a. Tin, naupang lam zawkte an tel theih nan youth leh sub-junior tournament rules tharte pawh siam a ni.