Mizoram Indoor Stadium lian ber Rajiv Gandhi Multipurpose Hall-a tan tur Samsung 3:16 LPS Pro Fight-a tel tumin mi 460 chuangin form an la chhuak tawh.
Nilaini thlengin LPS Office atangin form 462 pek chhuah tawh a ni a, mi 185-in an theh lut tawh ve thung. Nikum khan champion lai nen mi 274 an tel a, kum inah hian kum dang ang bawkin a duh apiang tan weight then hrang pangaah title chuh theih a ni.
Nikum aiin tel an tam ngei tura ngaih a ni a, tun inrinni thlengin form a lak chhuah theih. Kar leh thawhtanni thleng form theh luh theih a ni a, hemi ni hian tel turte Hawla Indoor Stadium-ah inbukin medical exam an hmachhawn bawk ang.
Nimin (nilaini)-ah management team chairman Pu Lalsawmliana Pachuau leh official sponsor Samsung 3:16 Plan Solution neitu Pu John Lalpekaten inremna thuthlung ziak felin, co-sponsor - Mana Motors, State Child Protection Society, RORO Polymers (Premium Water Tank), Zothan Autoworks leh D3 Business Enterprise-te nen inremna an siam fel bawk.
Management team leh venhim hna thawk tura rawih Salem Veng Branch YMA-ten inremna an siam bawk a, tun inrinni hian Rajiv Gandhi Multipurpose Hall tlawhin hmalakna dar tur hrang hrang an sawi ho nghal dawn a ni.
November 11-a tan tur championship-ah hian a tir lamah man chawi lovin a duh apiang tan a hmunah inhnek en theih dawn. Mahse, boruak a zira ticket Rs 30 leh 50 man siam tura ruahmanna siam lawk a ni a, engtik atanga ticket hralh chhuah tur nge tih erawh management team leh venhimna thawktuten an ngaihtuah tha leh dawn a ni.
Boruak tha leh hlawhtling taka Pro Fight buatsaih a nih theih nan Mizoram Boxing Association pawhin hma a la mek a, tunah hian championship urlawk nan Ramhlun Boxing Hall-ah mi thar inelna Training Centre Meet huaihawtin thawhlehniah tan a ni a, zirtawpniah zawh a ni ang.
Kumin atangin district hrang hrangah Mizoram Boxing hmalaknain training centre hawn a ni a, thla thum chuang kalpui a nih hnuah kumina boxing zir thar tan intihsiak huaihawt a ni. Centre 11 atangin boxer 170 chuang telin sub-junior, junior leh senior-ah hmeichhia leh mipa an inel a, chher zui theih tur talent tam tak an hmuh thu hruaituten an sawi a, LPS Vision-in live-in a pe chhuak a ni