17 May 2018 05:50

Inkhel

Mizo Sports Website hmasa ber

​Sam Allardyce out, Rooney In?

Thla ruk chhung an inrawih hnuah Everton chuan England boss hlui Sam Allardyce chu an ban leh ta.

Kum 63 mi Big Sam hian nikum November thla khan Ronald Koeman-a hmunruak luahin kum 2019 June thla thleng Everton-ah contract ziak mahse 2017/18 season zawh rualin an inmangtha leh ta a ni.

Big Sam-a'n Everton a enkawl tirh khan league table-ah 13-na an ni a, season a zawh chuan 8-naah a awmpui. Hetih lai hian a game khelhpui dan leh team a enkawl danah fans lam an lungawi thei lova, chuvang chuan Everton club hotute chuan Big Sam hi an ban ta nge nge a ni.

Rooney pawh Big Sam-a lakah hian a lawm lo hle tih a hriat a, season zawh hmain Rooney chuan MLS club DC United pan tumin a inbuatsaih a nih kha. Tunah Big Sam a chhuak ta a, Rooney chuan a hmangaih club tan a khel chhunzawm dawn nge dawn lo tih chu zawhna chhan harsa tak a ni.

Everton chuan manager thar tur an dap kual nghal char char a, Hull City leh Watford te lo enkawl tawh Marco Silva chu Allardyce-a thlaktu atan an rawih mai media te chuan an ring.

Everton chuan Shakhtar Donetsk coach Paulo Fonseca pawh an beisei deuh nia report a ni bawk a, hetih lai hian West Ham-in an ban tak David Moyes-a hmunruak luah turin an be ve mek nia sawi a ni bawk.