Italian club Salernitana chuan, Mexican goalkeeper Guillermo Ochoa chu free transfer in an lalut a, tun season daih contract an ziahpui.

Club America-a a contract a hman zawh hnuah kum 37 mi hian Mexican club hi a chhuahsan a, Serie A club Salernitana hian an duh chuan a contract hi season khat dangin a contract hi an pawh sei sak belh thei bawk a ni.

Ochoa hi Europe-ah a mikhual lova, a hmain European club Ajaccio, Malaga, Granada leh Standard Liege-ah te a lo khel tawh a, kum 2019 hnuah a vawi khat nan Europe-ah a kir.

An first choice goalkeeper Luigi Sepe a inhliam avangin Salernitana hian goalkeeper thar an zawng a, Ochoa hi nakkum January thla ni 1 atangin an chhawr tan thei dawn a ni.

Club football-ah Ochoa hi a hming hre tam lo hle mah ila, World Cup-ah erawh Mexico tan a chet that thin em avangin hriat a hlawh hle a, World Cup khelh zawh takah pawh khan Poland nen an inhmachhawn tumin Robert Lewandowski-a penalty a save nghe nghe a nih kha.

Salernitana hian tunah hian Serie A table-ah 12na an ni mek a, Janaury thla ni 4-ah champion lai AC Milan hmachhawn dawnin, hetah hian Ochoa hian Salernitana tana a game hmasa ber a khel maithei.

Ochoa hian kum 2005 atang daih tawh khan Mexico si ban a nghak tan tawh a, a ram tan hian game 134 lai khel tawhin, Mexico tana si ban nghak hnem ber a ni.