Sadio Mane chuan Mohamed Salah nen an inkar boruak tha vak lo chu a ziaawm leh tawh niin a sawi.
Liverpool leh Burnley inkhelh tum khan Sadio Mane chu a tawp thleng an khelhtir lo a. An thlak hma daih hian Egyptian striker Mohamed Salah chuan ball a pe duh lo a, hei vang hian a thinrim hle a. Salah chuan Mane hi ball pe ta se goal thun theihna hun tha pawh a neih theih a beiseiawm theih hmel hle.
He inkhelah hian Liverpool chu 3-0 in an chak a, Mane hian Salah laka a thinrimna chu a tilang hle a, a thup buai duh lem lo a. A hnu daih thlengin an pahnih inkar boruak hi a that loh phah hle a ni.
Inrinniah khan Liverpool chu Newcastle United nen an inkhel leh a, Reds hi 3-1 in an chak a, Premier League-ah point 5 ngawtin hma an hruai thei tawh a. He inkhelah hian Sadio Mane chuan goal hnih a thun a, Mohamed Salah chuan goal khat a thun ve bawk a ni.
Mane chuan Salah nen an inkar boruak chu a tha vek tawh niin a sawi a, an pahniha an inrem tawh avangin an inkar boruak chhia chu a reh hmak tawh niin a sawi chhuak.
“Salah nen kan inkar boruak chu a tha vek tawh a, thinrimna zawng zawng pawh a bo tawh a, kan inrem leh thlap tawh e,” a ti.
“Football-ah hian hetiang thil hi chu a thleng thei a, thil awm ngai lo pawh a ni hek lo a. A chang chuan hmaichhanah thil kan inhrilh a tul thin a, a chang chuan ball min pass ve loh hun te pawh a awm thin a, a la awm zui zel pawh a rinawm,” a ti bawk.
A sawi zelnaah, “Kan insawi rem tawh a, tunah chuan kan inrem vek tawh a, a hma ang bawkin thian tha tak kan ni leh tawh a ni,” a ti.
Salah chuan Mane nen an inkar boruak chu Twitter lamah a tarlang a, a nui liam vel mai mai a. Anni pahnih hian tun season chhungin Premier League goal 4 ve ve an thun tawh a ni.