Liverpool thiampuipa Mohamed Salah chu hliamin a kalsan hleithei lova, tunah hian inhliam leh tawhin, a ngal rek veilamah hliam a nei a, a inkhelh leh theih hun tur a sawi theih loh.

Tun season-ah Aigupta mi Salah hian a ngal rekah hliam a nei thei em em a, tunah pawh Egypt chuan ko mahse Salah hi a inhnukdawka, a ram tan Kenya leh Comoros a hmachhawn ve thei dawn lo.

Liverpool chuan an player Salah hi an training-na hmun Melwood nilo ah training neih an phalsak tih Sky Sports chuan a tarlanga, Liverpool hian Salah hi international break zawhah pawh awm hahdamna hun a pe rei deuh bik dawn tih Sky Sports chuan a tarlang bawk.

Salah hi a chawlh rih a ngai dawna, sawi tawh angin a lo kir hun tur sawi theih a ni lova, November ni 23-a Liverpool-in Crystal Palace an hmachhawn hunah pawh kum 27 mi a inlan theih a rinawm loh.

Salah hian tun season-ah Liverpool tan vawi 17 a khel tawha, goal kua khung tawhin, Leicester City an hmachhawn tumin a ngal rek hi a ti na a, he inkhelah hian second half ah lak chhuah a ni.

Leicester laka a inhliam hnu hian Salah hi a inkhel zel tho va, an game hnuhnung bera Premier League champion lai Manchester City an hneh tum pawhin Salah hian goal a khung nghe nghe a ni.