Pierre-Emerick Aubameyang chuan a teammate Bukayo Saka chu ‘Little Chilli’ tiin hming lem a vuahsak a, hetianga a koh chhan hi a sawi fiah.

Bukayo Saka chuan senior team lamah hun a hmang chho tan a, a season hman hmasak berah Emirates Stadium-ah a che chhe lo hle a, inelna hrang hrangah goal 4 a thun tawh bakah mi goal thun tur vawi 11 chu a siamsak tawh a ni.

Kum 18-a upa English winger Bukayo Saka hi khelmualah a chet that theih em avangin Arsenal manager Mikel Arteta pawhin khelhna hun a siamsak hnem chho viau a. Gunners captain Pierre-Emerick Aubameyang chuan rawlthar tha tho tak mai a nih vang hian ‘Little Chilli’ tiin a hming lem hi a vuahsak niin a sawi.

Aubameyang chuan, “Saka hi ‘Little Chilli’ (Hmarcha te) tiin ka ko thin a, hei hi French tawng chuan ‘Petit Piment’ a ni a. Hmarcha te anga te si, thak si kan tih ang deuhin, amah hi a lian vak lo a, chuti chung chuan a chakin a hlauhawm em em bawk a ni,” a ti.

“A la naupan ngaihtuahin khelmualah a tha hle a, a hlauhawm em em mai a. Nakin zelah pawh khawvela player tha berte zingah a tel theih ngei ka ring a. Saka hi duhna riau ka nei a, engtik lai pawhin thurawn a ngaithla peih a ni,” a ti bawk.

A sawi zelnaah, “Miin thurawn an pek a ngaithla peih em em mai hi tha ka ti a, amah lah hi a inngaitlawm em em lehnghal a. Lehlam pawl nawr phei hi a duh dan niin, a khelh danah hma pawh sawn belh zel a tum thin a, player ropui tak a la ni ngei ang,” a ti.

“Tunah kum 18 chauh a la ni a, hun a la ngah em em mai a. A bulah hian a tana pawimawh ber chu nuam ti taka inkhelh a ni tih pawh ka sawi thin a. Hma sawn belh zel tum turin ka fuih a, nakinah chuan dinhmun sang taka a la din theih tur thu ka hrilh thin,” tiin Aubameyang chuan a sawi bawk a ni.