Saitual GSA Cup-ah final chu May ni 6, Thawhtanni khan khelh a ni a, inkhel hmuhnawm takah 1st Bn. MAP Academy chuan sikhat faiin Lalthanglura Memorial FC, Kolasib an hneh a, no mawi an chawi ta a ni. 

April ni 30, 2019 atanga tan Mizoram Football Association hriatpuina hnuaia Saitual GSA Cup 2019-ah hian Mizoram hmun hrang atangin team 18 an tel a, Saitual Public Playground-a khelh a ni.

Final-a goal awmchhun thuntu chu Rammuansanga a ni a, minute 74-ah 1st Bn. MAP Academy chakna goal khungin, inkhel tir atangin Academy naupangten game thununin an nawr zawk hle. Goal thunna hun tha an insiam hnem ang erawh chuan an thun mawh hle a, Kolasib lamin counter attack atangin an nawr tlang ve fo bawk. Inkhel boruak a sang hle a, second half-ah 1st MAP Academy player hnawhchhuah a ni a, a hnu lawkah 1st MAP Academy player hnawhchhuah a ni leh a, player 10 ve vein a tawp an khar.

Champion team 1st Bn. MAP Academy-in sumfai Rs 70,000 leh trophy an dawng a, runner up Lalthanglura Memorial FC, Kolasib-in Rs 30,000 leh trophy an dawng ve bawk. Khawlailung FC ten Fairplay trophy dawngin hei hian sumfai Rs 5,000 a keng tel a. Best Player chu Lalruatkima, Kolasib niin golden boot dawngtu, top scorer chu R. Lalthantluanga, Khawlailung a ni a, goal 8 a khung a, heng mimal lawmmante hian sumfai Rs.3000 leh trophy a keng tel a ni.

Final khelh hma hian closing programme hun tawi hman a ni a, he huna khual lian H.Thangchungnunga, Sports Promotion Officer chuan Saitual GSA-in ram pum huap football tournament an siam thei chu an fakawm thu sawiin hlawh nei lova sports tana mi inpe te hi ram tan an hluin hmasawnna bul a ni a ti.

Khual lian chuan, Mizote hi tun hma chuan tournament dawna inbuatsaih chauh mai thin kan ni a, tunah erawh kum tluana practice-in tournament hmachhawn turin an inpeih reng thei tawh hlawm a ni. Nasa takin sports-ah hma kan sawn ta a, a bikin Football phei chuan Mizoram hming a titha hle a, National Games, Santosh Trophy, I League leh a dang dangahte kan champion chho ta zawt zawt mai a, tha thlah lova kan tan mar pat a ngai a ni tiin Saitual GSA te hmalaknaah theihtawp chhuaha tanpui a inhuam thu a sawi bawk.