Sairang Dinthar a MFA Field siam chhoh mek chu tun atanga reilote ah phullem phah a ni mai tawh dawn a, vawiin khan phullem phahna tur hmanruate phai atangin motor lianin a rawn phur lut tan ta a. Tunkar chho hian bungruate a rawn thlen fel beisei a ni.

Khawvela football thuneitu lu ber FIFA-in India rama Pilot Project paruk (6) a kalpui zinga a telh, kum 2015-a a lo tiam tawh - Sairang Dinthar field a artificial grass phah tura hmalakna chu tihhlawhtlin a ni tep tawh a. Tunah hian phullem phahna tur zawl zau tak, a dung meter 120, a vang metre 80 zeta zaua laih zawh tawh niin, chumi chhungah chuan football field (meter 68x105 a zau in) phullem chu phah a ni dawn a ni.

Phullem hi Fifa pawmpui Edel Grass, Netherlands company in a phah dawn a, bungraw chitin mai tuipuiral (the Netherlands) atangin a rawn thleng mek a. Dutch engineer ten tun atanga reilote ah phullem hi an phah tan dawn a ni.

Sairang Dinthar a MFA khelmual ah hian a hungna mumal tak siam a ni dawn a, MFA chuan a kiangah hostel leh floodlights dah theihna turte a hisap lawk bawk a, kumin favang chhovah a khelmual ngau ngau hi hman theiha peih fel an tum a ni.

Kum 2017 khan India chuan Fifa Under 17 World Cup a thleng a, a thlen hma kum 2 a la awm tih, kum 2015 ah khan South Asia a FIFA Regional Development Officer Dr. Shaji Prabhakaran leh AIFF a hotu thenkhatte chuan Mizoram football dinhmun an rawn zir chiang a. Sorkar hotu lu ber berte rawn kawmin, football a inhnawmhnawih mi tam tak - coach te, team neitute leh Football hruaitute an kawm a. Mizoram in kum 3/4 vel kalta atanga hma a sawn chhoh dan te chipchiar takin an rawn zir a ni.

Mizoram Football hmasawn chhoh dan leh inkaihhruai danah an mit a tlung hle a, Mizoram FA chu tanpuina pek tlakah an ngai a, India rama FIFA Pilot Project ah Mizoram chu an telh ta a ni.