Sadio Mane chu Real Madrid in lak an duh tih thawm a ri chho a, Liverpool chuan Mane hi an hralh dawn a nih pawhin £130 million aia tlawm chuan chhuahtir an tum lo hle.

Zinedine Zidane chuan nipui transfer window inhawn hunah Real Madrid squad chu khawih danglam a tum hle niin an sawi a. Player a neih sa chu a chhuahtir nual ang a, hmun dang atangin player lar deuh lak tur a hual chho mek bawk a. Player lak luh atana a hual zingah hian Sadio Mane, Eden Hazard leh Paul Pogba te chu a langsar zual niin an sawi.

El Confidencial-in a tarlan danin Sadio Mane hming chu lang ve mahse, Real Madrid hian an duh ngawih ngawih a ni ve lem lo a. Mane hi an la dawn a nih pawhin man to vak lo bakin an lei ngam dawn lo a, Liverpool-in a man an chhiar chu a to uchuak hle niin an sawi a, hetiang zat an chhiar tlat a nih chuan Real hian an lei kher loh hmel a ni.

Spanish chanchinbu lar hian an player tha tak mai chu man tlawm taka chhuahtir an tum lo hle niin an ziak a, nikum khan FC Barcelona chuan Philippe Coutinho chu £145 million zetin an lei a, khatiang deuh khan Mane pawh an hralh dawn a nih chuan a man chu chhiar ve deuh hlek an tum a ni.

Senegal star Mane hi tunah chuan Liverpool tlar hma lamah a pawimawh chho hle a, Mohamed Salah leh Roberto Firmino te nen a hmatawngah an chhawr rim hle a. Tun season chhungin inelna hrang hrangah Mane hian game 42 a khel tawh a, hengah hian goal 21 chu a thun tawh a ni.

Tun season-ah a chet fuh chhoh deuh avangin Zinedine Zidane chuan Mane hi Bernabeu Stadium lama seng luh a rilruk chho ve tan niin an sawi a. Mahse, a player duh ho chu man tlawm tak an ni dawn lo tih a hre chiang sa vek a, Paul Pogba a beisei dawn a nih chuan Old Trafford-ah kum hnih leh a chanve a la nei a, hei vang hian Manchester United chuan a man pawh an chhiar hnem viau tura ngaih a ni.

Real Madrid hian player lei tharna tur hian pawisa nei teuh dawn mahse an duh zat tur chu a la pha dawn lo chiang a. Hetiang a nih avang hian an player neih sa thenkhat chu pawisa tam zawk an neih theihna turin an hralh then ngei a ngai dawn a. Tlema player lar ve deuhte pawh hralh then an rilruk mek a, Toni Kroos, Gareth Bale leh Luka Modric te chu chhuak tura an sawi rik nasat zual an ni.