Sachin Tendulkar-a’n kum 46 a tling

25th April 2019, 02:04AM

Vawiin April 24, 2019 ah hian Sachin Tendulkar chuan kum 46 a tling ta a, a pianchamah hian a chanchin langsar zual tlem han tarlang ila.

Khawvela cricket khel thin zinga a ropui ber pawla sawi loh theih loh, Sachin Tendulkar hi April 24, 1973 khan Dadar, Mumbai-ah a piang a. Kum 24 chhung cricket a khelh lai khan cricket khawvel chu a awp hneh hle a tih theih a, record pawh thahnem tak a siam hman a ni.

Sachin ‘Master Blaster’ Tendulkar hi mi tam tak chuan ‘God of Cricket’ ti hialin an sawi a, a vanglai hian mi tih theih loh tam tak a ti thei a, record pawh a siam hnem hle bawk a, tun thleng hian a record siam tam tak chu khum thei an la awm lo hlawm a ni.

‘Little Master’ tia an sawi thin, Sachin hi cricketer zingah chuan ODI a double century siam thei hmasa ber niin, 2010 khan Gwalior-a South Africa nen an inkhelh tumin double century hi a siam a ni.

Batsman zingah chuan Sachin Tendulkar hi ram tana century 100 siam tling thei hmasa ber leh a awm chhun a la ni a. Amah hnaih bertu chu Ricky Ponting niin, Ponting hian ram tan century vawi 71 a siam tling a, Team India skipper Virat Kohli chuan century 66 siam tawhin, pathumnaah a awm mek a ni.

Tendulkar hi cricket a khelh thin laiin Man of the Match atan an thlang ngun hle a, a pumpuiah vawi 62 ngawt an thlang a, hetiang zat Man of the Match a thlan awm chhun niin, Man of the Series chawimawina pawh vawi 15 chu a dawng hman a ni.

Australia leh Sri Lanka laka century vawi 8 aia tam siam thei hi batsman zingah pakhat chauh an la awm a, chu chu kum 24 chhung India innghahna lo ni thin Sachin Tendulkar hi a ni.

Sachin hi infiammi zingah chuan India rama mi mal chawimawina sang ber ‘Bharat Ratna’ dawng thei hmasa ber niin, he chawimawina hi 2013 khan a dawng a. Hei bakah hian chawimawina sang dang - Arjuna Award (1994), Rajiv Gandhi Khel Ratna (1997), Padma Shri (1999) leh Padma Vibhushan (2008) te pawh a dawng tawh a ni.

A piancham lawmpui hian milar thenkhat chuan social media kaltlangin thu eng eng emaw an tarlang hlawm a. VVS Laxman chuan Twitter lamah Sachin piancham lawmpuina hi a tarlang a, a ngaihsan thu a ziak tel a. Batsman dang Virender Sehwag pawhin a lo khelhpui thin Sachin piancham lawmpuina hi a tarlang bawk a ni.

November 16, 2013 khan India leh West Indies te chuan Wankhede Stadium, Mumbai-ah Test an khel a, Sachin Tendulkar chuan Test match vawi 200 a khelhna niin, hemi zawh hian cricket khelh a chawlhsan zui a ni.

Copyright © inkhel.com 2024. All rights reserved.