Khabib Nurmagomedov chu Russia rama football club pakhatin an sawm a, a sawmtu hi third division club FC Kamaz an ni.
UFC icon Khabib Nurmagomedov chuan tun hnaiah khan Dubai khawpuia Spartak Moscow training school-ah football a pet a, a thiam thil a entir vel a. Hetianga a che vel thlalak hi a darh nual a, lawm pawh a hlawh hle.
FC Kamaz chuan Khabib-a awm dan vel hi an lo hre ve a, Instagram lamah an club zawm tur hian an sawm ta niin an sawi a. “Football huangah a vawi khatna atan i inlan theihna hun tha kan club hian siamsak che kan duh a. PFL hi football UFC a ni a, match tina chak tumin kan khel thin a, FNL lama luh tum mek hmasawn duh em em team kan ni,” an ti.
“Kan club i zawm theihna turin i certificate tur pawh kan buatsaih nghal a, engkim a kal tluang thei vek a nih chuan engtikah nge min rawn zawm tan dawn tih sawi chiah hmabak a ni mai,” an ti bawk.
Russian club FC Kamaz hian second division lama kai chhoh tumin tan an la mek a, February 12 atang khian Novorossiysk-ah kar thum chhung training camp an nei tan dawn a, hetah hian Khabib Nurmagomedov chu tel ve turin an sawm nghe nghe a ni.
Kum 32 mi Khabib hian football chu a ngaina ve hle a, Real Madrid chu a club tan ber an ni a. Tun hnaiah khan Liverpool defender Virgil van Dijk chu thla a lakpui nghe nghe a ni.
Hmanni deuhah khan football atchilh ve tak Khabib hian fiamthuin free agent a nih thu sawiin, footballer ni turin a inbuatsaih chho mek niin a sawi a. Vawi khat phei chu MMA aiin football a thlan zawk thu te pawh a lo sawi chhuak tawh a ni.
UFC Russia hnenah Khabib chuan, “Ka tan chuan football hi infiamnaa chungnung ber a ni a, khum thei dang hi a awm lo a. Ka naupan lai atang tawh khan football player nih hi ka thil chak ber a ni thin a, football pawh ka en nasa thei hle,” a ti.
“Engti kawng emaw tak chuan football hi MMA aiin a tha zawk daih a, tu mah kutthlak a ngai ve lo a, khelmuala chhuah tawp a, mi mit hmuhah eng nge kan tih theih tih va lantir kha a ni mai a. Thil awlsam tak ni lo mahse ka ngaina a, UFC leh MMA ai pawhin ka ngaina zawk,” a ti bawk.