Russia relay team medal lâk kir sak an ni

02nd February 2017, 07:02AM

Kum 2012 London Olympic-a 4x400m relay intihsiaknaa silver medal dawngtu Russia relay team chu an medal dawn lâk kir sak an ni veleh ta. Usain Bolt-a telna Jamaican relay team chu Beijing Olympic-a an gold medal lâk kir sak an lo ni tawh bawk.

Russia relay team zinga mi Antonina Krivoshapka-i'n damdawi hman phal loh 'turinabol' a lo hmang tih hriatchhuah a ni a, International Olympic Committe(IOC) chuan Russia medal an lâk kir sak phah ta a ni.

IOC-in khawl tha zawk hmangin Beijing leh London Olympic-a tel te thisen endik nawnna a nei mek a, infiammi damdawi hmang hmuhchhuah belh zel an ni. Russian discus thrower Vera Ganeeva leh Turkish boxer Adem Kilicci-te pawhin damdawi hman phal loh an hmang tih finfiah a ni tawh a, nimahsela infiammi pahnih hian medal an dawng pha lo thung.

Russian infiammite'n damdawi hman phal loh an hmang nasa hle a, World Anti-Doping Agency tarlan kum 2011-25 inkar khan Russia sawrkar chuan a infiammi 1000 chuang chu damdawi hman phal loh a hmantir char char a ni.

IOC-in thisen a endik nawnnaah pawh hian Russia infiammite an fihlim lo ber a, Beijing Olympic-ah khan Russian infiammi 17 zet chuan intihchakna damdawi an hmang a, London Olympic-a telte thisen endiknaah pawh hian Russia infiammi 13 lai an tel leh tawh a ni.

Source: BBC Sport

Image: Getty

Copyright © inkhel.com 2024. All rights reserved.