​Russia ramah MMA Union International Championship neih a ni dawn

04th September 2019, 05:09PM

Russia MMA Union chuan khawvel hmun hrang hranga MMA amateur fighter, International Mixed Martial Arts Federation leh World Mixed Martial Arts Association hnuaia MMA amateur fighter zawng zawngte tan inelna a buatsaih dawn a. Mansiysk, Russia-ah inelna hi neih a ni anga, tun thla ni 16-21 hian inelna hi kalpui a ni dawn.

Kum 18 chunglam tana inelna a ni dawn a, weight division hrang hrangah inelna hi kalpui a ni ang. Weight zang ber Strawweight atangin Super Heavyweight thleng inelna hi neih a ni anga, hemi Championship Match-ah hian gold medal la tan US Dollar 2000 an hlawh chhuak anga, silver medallists te chuan US Dollar 1000 an hlawh thung anga, bronze medallists te chuan US Dollar 500 an dawng bawk ang.

An inelna neihna tur Khanty-Mansiysk, Russia-ah hian khawvel sport lar tak tak neih tawh thin a ni a. Chung zingah chuan Biathlon World Cup Competition, Continental Hockey League leh Chess Olympiad te niin; hemi piahah World Cup hrang hrang neih tawh thinna a ni bawk.

Russian MMA Union Men's International MMA Cup inelna hi khawvel hmun hrang hrangah IMMAF-TV kaltlangin chhuah a ni dawn nghe nghe.

Russia MMA Union Chairman Fedor Emelianenko chuan, "He inelna hi a sang dawn tih ka sawi ngam. Khawvel hmun hrang hranga MMA amateur fighter a hip khawm dawn hlein ka hria a, khawvel puma MMA hmingthanna a lanchhuah zelna tur a ni, " a ti .

He inelna lo awm tura khel duh apiang chuan National MMA Federation an thlunzawm pui an be thei anga, thuchiang zawk hre duh tan email kaltlangin mikhail.mazur@gmail com ah zawh chian theih a ni ang.

Copyright © inkhel.com 2024. All rights reserved.