Jose Mourinho-a assistant manager lo ni reng tawh Rui Faria chuan kum 17 chhung Mourinho a zui hnuah amahin club a enkawl ve dawn ta.

Sawilan tawh angin Rui Faria hian Mourinho chu kum 17 chhung ngawt rinawm taka a zui hnuah nikum nipui lai khan Mourinho thlazar hnuai atangin a inla hranga, Qatar Stars League champion lai Al Duhail chuan Faria hi an head coach ni turin an ruai thar a, a hna hi a tan nghal dawn a ni.

Kum 2001-a Mourinho-a’n Uniao de Leiria a enkawl lai atangin Faria hian Portuguese manager lar hi a zui tawh a, Mourinho nen hian Uniao de Leiria bakah hian Porto, Chelsea, Inter Milan, Real Madrid leh Manchester United-ah te an lo thawk dun tawh.

Kum 43 mi hi Mourinho-a’n Uniao Leiria leh Porto a enkawl lai khan fitness coach niin, kum 2004-a Chelsea-a an insawn atangin assistant coach hna thawkin, amah in manager hna a thawk chho ve tan dawn ta a ni a, eng nge a an dawn chu hriat a chakawm tawh hle.

Faria hi nikum nipui lai khan Arsene Wenger thlaka Arsenal enkawl tur anga sawi a ni nasa hman hle a, a pu hlui Mourinho pawhin Premier League club enkawl thei a nih zia a lo sawi tawh bawk.

Kum 17 chhung ngawt mai khawvela manager hlawhtling ber zinga mi Mourinho a zui avang hian a theuneu lo hle turah Faria hi ngaih a ni a, Qatari club enkawl phawt dawn mahse nakin hun zelah a hmel hi England leh Europe lamah kan la hmuh ngei a beiseiawm hle a ni.