Nizan zanlai ah khan Chilean midfielder Arturo Vidal chuan a Ferrari car a chetsual puia, Chile police te chuan Vidal chu rui chunga lirthei khalh a nih thu an sawi.

Casino atanga a nupui nen an haw na lam Santiago chhim lam kawngpui ah Vidal te hi a chesuala, a motor hmalam a sawp chhe ve hle a ni.

San Luis de Buin damdawiin ah hun reilote chhung enkawl niin, a hliam a nat vak loh avangin chhuahtir a ni lehnghal a, a nupui pawh ngaihtuahawmin a awm lo a ni.

Damdawiin atanga an chhuah hnuin Vidal chu police station ah hruai a ni nghala, Chilean police colonel Ricardo Gonzalez chuan he lirthei sen khalhtu hian rui chungin a khalh a ni tiin a sawi.

Social media ah Vidal chuan tawhsual an tawh thu a nemnghet thuaia, an ngaihtuahawm loh thu leh a thiam lohna a awm loh thu te chenin a sawi ve bawk.

Vidal hian ram tan Copa America a khel meka, he inelna ah hian goal thum thun tawhin Chile top scorer a ni meka, kar hmasa a Ecuador an hmachhawn tum pawh khan goal hnih lai a khung a ni. Tun Zirtawpni hian Bolivia an hmachhawn leh ang.

Chile Under-20 coach Jose Sulantay chuan Vidal chet dan chu a dem thu a sawi a, inelna lian tham khelh a nih laia hetiang thil a thlen theih avanga coach Jorge Sampaoli pawh a dem thu a sawi bawk.