16 Mar 2020 04:21

inkhel

Rual pawl rih loh a finthlak: Stephen Curry

Stephen Curry chuan tun hnaia coronavirus darh mek lai hi chuan tu te pawhin rual pawl tam lo ila, chhuak tam lo ila a duh thu a sawi.

NBA chuan Nilainiah khan COVID-19 a darh mek avangin league chu chhunzawm rih loh tur a nih thu an puang a. He hri leng mek vang hian khawvel hmun hrang hrangah infiamna eng emaw zat chu ruahman anga neih zui theih a ni lo hlawm a ni.

Hri leng darh mek hi United States ah chuan mi 3,802 in an kai tih finfiah a ni tawh a, heng zinga 69 te chuan nunna an chan tawh nghe nghe a ni.

Golden State Warriors star Stephen Curry chuan Twitter kal tlangin video hmangin mipuite hnenah chhuak tam lo tur hian thu a chah a ni.

Curry chuan, “Tun hnaiah hri leng vangin khawvel hmun hrang hrangah an buai hle a, eng pawh hi a chiang lo nuaih hlawm mai a ni,” a ti.

“Kan chhehvel boruak thlir hian mi tu te pawhin chhuah tam loh hi kan zir a pawimawh hlein ka hria a. Rual pawl tam vak loh a him rih a, pawimawh tawpkhawkah lo chuan hmun dangah kal tam lo ila a tha khawp ang,” a ti bawk.

A sawi zelnaah, “Mi zinga awm tam loh hi tum hram hram ila a finthlak ber a, chuti zawng chuan he hri leng darh zel tur hi thui tak chu kan veng thei dawn a. Mi bula kan chhuak lo thei lo a nih pawhin hnaih lutuk lo ila, feet 6 vel tala hlaah awm hram tum tur a ni,” a ti.

“Khaw laia chhuahin kut sil uluk a pawimawh hle a, tui leh sahbawn hmanga ngun taka kut kan sil thin a nih chuan he hri leng darh zual zel tur venna kawngah tha kan thawh ve tihna a ni ang. Tu te pawhin hma kan la thei a, pawna chhuah tam loh tluka pawimawh hi a awm lo a ni,” tiin Curry chuan a sawi a ni.