French Open khelh chhoh mek a ni a, Thawhlehni inkhel eng emaw zat chu ruah surin a tibuai hlawm a, heti chung hian inkhel a awm nual tho a. 3rd seed Marin Cilic chuan a khingpui a hneh nghal a, second round a lut a, Canadian rawlthar Denis Shapovalov pawhin a vawi khat telnaah second round a lut bawk.

Marin Cilic chu Australian James Duckworth nen an inkhel a, US Open champion lo ni tawh Cilic hi 6-3, 7-5, 7-6 (4) in a chak a. Grand Slam final hnuhnung pathuma vawi hnih final lut thei Cilic te inkhel hi ruah surin a tikhaihlak rei hle a. Duckworth hi nikum French Open-ah a ke a tihnat vangin a tel thei lo a, Roland Garros-ah hian vawi 4 a tel tawh a, vawi khat mah a la chak lo a ni.

Canadian rawlthar Denis Shapovalov chuan seeded player ni chunga Grand Slam match a khelh hmasak berah a khingpui chu darkar 2 chhungin a hneh a, second round a lut.

Kum 19-a upa Shapovalov hi Australian mi, 59th rank John Millman nen an inkhel a, 7-5, 6-4, 6-2 in a chak a, 6-1, 6-3, 7-5 a Ryan Harrison (US) hnehtu 70th rank German Maximilian Marterer nen an inkhel leh ang.

Nikum khan Shapovalov hian Paris-ah qualifying opening round a pel thei lo a, kumina a chak takah chuan French Open khel thei zinga naupang ber dawttu a ni.

Grand Slam title vawi hnih la tawh Garbine Muguruza chuan a khingpui hnehin first round a paltlang a. Muguruza hi amah ang bawka Roland Garros champion lo ni tawh Russian Svetlana Kuznetsova nen an inkhel a, 7-6 (0), 6-2 in a chak.

2016 final-ah Garbine hian Serena Williams a hneh a, nikum khan a title humhim tum viau mahse 4th round-ah a chak zo ta lo a. Tunah hian kum 32-a upa Kuznetsova chu 43rd rank a ni a, Paris khawpuia inelnaah hian a zawnin vawi 16 a tel ve ta a, 2009 khan a lo champion tawh a ni.