16 Sep 2020 04:37

inkhel

Royce Gracie a entawntlak ber: Georges St-Pierre

Georges St-Pierre chuan MMA fighter zinga ropui a tih zualte a sawi a, Royce Gracie chu entawntlak a tih ber thu a sawi.

Canadian fighter Georges St-Pierre chu MMA ngaisangtu tam tak chuan fighter awm tawh zawng zawnga ropui ber tiin an sawi thin a. Weight hniha champion lo ni tawh hian insual a chawlhsan tawh a, heti chung hian amah tluk thei tur hi mi tam tak chuan an la hre chuang lo a ni.

St-Pierre chuan MMA fighter awm tawh zingah chuan Royce Gracie chu entawntlak ber nia a ngaih thu a sawi a. “Royce Gracie kha he infiamna thlak danglamtu ber a ni chiang a. Insual tak tak hi eng chiah nge a nih tih hi khawvel mipui hmaah a pho lang a ni,” a ti.

Brazilian fighter Royce Gracie chu UFC Hall of Fame ah pawh a tel a, UFC huangah chuan lar hmasa ber pawl niin, jiu-jitsu chu a vawrh lar hle a, insualnaa hman atan tangkai leh hlauhawm tak a nih zia a tilang chiang hle.

GSP chuan, “Jon Jones hi fighter ropui ka tih zinga sawi tel loh theih loh a ni a. Tun dinhmunah phei chuan Jon Jones aia tha hi an awm lo ti ila ka sawi sual lo ang,” a ti.

“Khabib Nurmagomedov pawh a la awm bawk a, hei pawh hi fighter ropui tak mai a ni a. Mi dang pawh tha tak tak chu an la awm teuh bawk a, chutih rualin kan hun hmaa mi te kha kan theihnghilh a thiang hauh lo a, anni khan kan tan kawng an lo sial fel vek a ni,” a ti bawk.

Jon Jones leh Khabib Nurmagomedov te chu UFC in pound-for-pound list an tih chhuahah a sang zual pahnih an ni a, Jones chu pakhatna niin, Khabib chu pahnihna a ni.

Jones chuan vawi khat chiah chak loh a la nei a, chu pawh an disqualify vang niin, Khabib chu octagon chhunga hneh loh nei loin a la kal tluang mek a ni.