23 Nov 2018 03:57

inkhel

​Round ruk chhungin Fury-a’n Wilder a KO ang – Dave Allen

British heavyweight boxer Dave Allen chuan a British pui Tyson Fury chuan Deontay Wilder chu round ruk chhungin a knock-out tur thu a sawi.

Fury hian WBC champion Wilder chu Los Angeles-ah thlaleh December ni 1 hian a hmachhawn dawn. Dave Allen leh Fury-te hian training an nei dun thin a, sparring partner pawh an lo ni tawh thin. Allen chuan, “British title level-ah ka awm mek a, mahse chuti chung chuan Fury hian a kut pakhat hnung suihin min hneh thei a, chuti khawpa tha chu a ni.

“Kum tam tak kalta atang khan Fury chu ring-a ka hmachhawn tawhte zingah a la hnek nat ber thu ka sawi thin a, a ni anga hnek na hi ka la tawng lo. Zep loh chuan midang tihnat hi nuam a ti berin ka hria a, a thiamnaa midang chhaih kawlh hi a thiam hle bawka, round ruk chhungin Willder hi a knock out ngei ka ring.

“Tupawh knock-out thei khawpa hnek na nimahse Fury hian inhnek nuam a tih avang hrim hrim leh midang chhaih kawlha tih nat a chak avangin a tumpuite a knock-out lawk lo thinin ka hria,” a ti.

Combat sports khawvel chuan The Gypsy King leh The Bronze Bomber-te inhnek tur hi a nghakhlel tawh hle a, December ni 1 kan hnaih tawh hle bawk nen, inhnek hmuhnawm tak kan beisei tlanga, a tu emaw zawk zawk hi an in KO lovang tih a sawi theih loh a ni.