Round of 16 atangin state dang boxer-ten Yodha 4x4 Pickup LPS Pro Fight an khel dawn a, Manipur manager Irungbam Herojit Singh chuan title pahnih an lak ngei a beisei.
Nilainiah Hawla Indoor Stadium, Republic Vengthlangah weight hrang pangaa round of 16 khel tur an inbuk a, Manipur atangin W Alexander Meitei leh KH Sanamach Singh inbukin an tling ve ve.
Manager Herojit Singh chuan an boxer pahnihin Mizorama boxing championship lian leh thawm nei ring berah hlawhtlinna an chan theih ngei a ring a, chutiang tur chuan an feh chhuak tih a sawi.
"Kan boxer pahnih an champion ve ve ang. Ka ring tawk khawp mai," tiin Herojit Singh chuan a sawi a, Manipur atang hian hruaitu pathumin boxer pahnih an tawiawm a ni.
Bantamweight-ah 2015 World Junior Championship khel tawh Alexander a tel dawn. Vawi hnih Manipur champion a nih tawh bakah 2012 khan All India Inter SAI-ah gold medal a hnek chhuak tawh bawk.
Sanamach Singh chuan middleweight title a chuh ve thung dawn a, Manipur champion lai niin kum 20 a la tling lo. Kar leh thawhtanni zanah Muthi boxer Timothy Lalbiakdika Nungate nen an intum dawn a, hemi zan tho hian Alexander chuan Muthi rawlthar beiseiawm Malsawmkima hmachhawnin bantam quarterfinal luh a tum ang.
Bantam-ah champion lai Zonuntluanga'n title humhim turin hriam zawka inlan a tum tih a sawi. Dinthar fighter Tetea hian Title Fight hnuhnung ber 2017 khan HC Lalramfela a hneh a, a vawi khat nan a kawnghren a humhim. 2015 champion Chawngtlai boxer Ramfela'n title lak kir leh ngei a tum ve thung a, hriat hlawh tawh Laldingliana (Tuipui) pawhin bantam huangah title a beisei.
Middle-ah champion lai Zarzoliana'n Title Fight a khel thei dawn lo va, zirna a chhunzawm thar leh avangin a inbuatsaih thei lo tih a sawi. Tun tumah hian vawi li lightheavy-a champion tawh Serchhip chhuanvawr Abel Lalawmawia chuan middle-ah a khel. Lightheavy huanga hriat hlawh tawh Lallawmkima Sailo leh H Lalrinhlua bakah Manipuri Sanamach Singh te nen middle champion thar nih an tum dawn.
Kum thum a zawna Meghalaya champion ni mek Pynskhemlang L Nonglait leh vawi hnih Arunachal Pradesh champion ni tawh Heli Tana Tara chuan Mizo chhuanvawr NT Lalbiakkima kut atangin lightfly kawnghren chhuhsak an tum a, championship hnuhnung ber Title Fight-a chak zo ta lo Cherhlun boxer F Zoramchhana'n hmasawn ngei tumin a khel dawn bawk.
Light-ah 2016 atanga 2018 thlenga Arunachal Pradesh champion leh champion lai Poken Siga leh vawi thum Meghalaya champion ni zawn mek Dondor Marwein chuan Govt Complex fighter Lalrinawma kut atanga title laksak tumin an khel dawn a. Khuangthing boxer Vanlalawmpuia leh 2010 lightfly champion ZD Lalchhuanawma chuan light champion thar nih an tum bawk.
Round of 16 zan hmasa ber, ningani zanah Arunachal boxer pathumin an khel nghal vek dawn a, lightfly-ah Tana Tara leh Zemabawk fighter JH Rosangpuia, bantam-ah Kogam Potom leh Saikhamakawn rawlthar Vanlalruatpuia, Light-ah Poken Siga leh Mualpui tlangval C Lalhruaitluanga an intawng ang.
Lightheavy champion lai HC Johnkenty Vanhlimpuia kawnghren chhuhsak tumin boxer pali chiah an tel. Jack Lalsangliana (Chaltlang Lily Veng) leh Hmingchungnunga (Zemabawk) chuan March 4-ah semifinal khelin, March 5-ah DK Munga (Hrianghmun) leh Vanlalchhuanga (Lunglei Venglai) chuan final luh an inchuh ve thung dawn a ni.
Round of 16 atangin a hmuna en tur tan ticket Rs 30-a lei a ngai dawn a. Title Fight thlengin R Dengthuama Indoor Stadium, Mualpuiah vek khelh a ni ang.
Round of 16 February ni 21, Ningani 8:00 PM- Bout 8 Fixtures
LIGHTFLY
Heli Tana Tara (Arunachal Pradesh) v JH Rosangpuia (Zemabawk North)
C Zosangmawia (Chaltlang) v TC Ramchullova (Lawngtlai)
BANTAM
Kogam Potom (Arunachal Pradesh) v Vanlalruatpuia (Saikhamakawn)
Johan Lalnunpuia (Sihfa) v Laldingliana (Tuipui)
LIGHT
Vanlalawmpuia (Khuangthing) v Lalnunmawia Sailo (Serchhip)
C Lalhruaitluanga (Mualpui, ITI Veng) v Poken Siga (Arunachal Pradesh)
MIDDLE
Abel Lalawmawia (Serchhip) v Lalthanzuala (Phulmawi)
Laltanpuia Renthlei (Hnahthial) v Lalchhantluanga (Champhai Zotlang)